Aba banyeshuri b'abakobwa bashimuswe mu gitondo cyo kuri uyu wa Gatanu tariki 26 Gashyantare 2021.
Ababonye iri shimutwa, bavuga ko babonye abantu bitwaje intwaro baje n'amaguru bagatera ishuri ryisumbuye ryitwa Jangele bakabanza kurasa ubundi bagashimuta bariya bakobwa babakuye mu byumba bararagamo.
Umwarimu wabonye kiriya gitero, yavuze ko bashimutse abana 421 ariko ko nyuma haje kuboneka abagera muri 55 mu gihe abandi bose bataraboneka.
Igipolisi cya kiriya gihugu cyahumurije ababyeyi bari batangiye kuza ku ishuri basaba ko babasubiza abana babo, kibizeza ko ku bufatanye n'igisirikare baza kubona bariya bana.
Ntiharamenyekana abagabye kiriya gitero gusa iyi Ntara ya Zamfara ni imwe mu zikunze kwibasirwa n'imitwe y'iterabwoba ikunze gushimuta abantu kugira ngo bayihe amafaranga.
Igitero nk'iki giheruka, ni icy'abanyeshuri b'abahungu n'abarimu babo baherutse gushimutwa mu Ntara ya Niger kugeza ubu bakaba bataraboneka.
Igitero kizwi cyane ni icyo muri 2014 ubwo abarwanyi b'umutwe uvuga ko ugendera ku mahame akarishye ya kisilamu wa Boko Haram washimutaga abakowa bagera muri 200 ubakuye ku ishuri rya Chibok.
UKWEZI.RW
