Gen. Rwigema wari Minisitiri wungirije w'Ingabo wa Uganda ariko ngo yakundaga kuvuga ku Rwanda ndetse n'ibibazo by'amoko byari byararuzahaje muri ibyo bihe.
Yabwiye bari aho icyo gihe ati: 'Rwigema yakundaga kumbwira iby'iwabo n'ibijyanye n'ivangura.'
Abandi mu babaye hafi uyu muyobozi wa gisirikare bakunze kuvuga ko ibintu by'amacakubiri n'amatiku yabyamaganiraga kure. Akaba umugabo ushyira imbere igihugu.
Ni mu gihe yari afite gahunda yo gutangiza urugamba rwo kubohoza igihugu yahozaga ku mutima, akava mu buzima bwiza bwo yarimo n'ibyubahiro byinshi yahabwaga nk'umwe mu beza NRA yari ifite.
Urukundo rw'akazi ke rwatumaga afata imododa n'abasirikare akajya ku irasaniro mu majyaruguru ya Uganda, aho hari bamwe banze kuyoboka ubutegetsi bwa Museveni.
Kuri uyu 1 Gashyantare 2021, Abanyarwanda barizihiza umunsi w'intwari z' u Rwanda. Muri bo harimo Gen. Fred Rwigema bamwe bemeza ko ari no mu ntwari za Uganda.
Fred Rwigema, ni intwari iri mu cyiciro cy'Imanzi, kimwe mu byiciro bitatu by'intwari z'u Rwanda. Ibyo byiciro bitatu ni Imena, Imanzi n'Ingenzi.
Icyiciro cy'Imanzi gishyirwamo intwari y'ikirenga yagaragaje ibikorwa by'akataraboneka birangwa n'ubwitange, akamaro n'urugero bihebuje.
