Ibiro ntaramakuru Reuters bisubiramo amagambo ya John Nkengasong ukuriye ikigo cyo kurwanya ibyorezo cya AU atangaza ibi, gusa ntiyavuze itariki iyo gahunda izatangiriraho.
Mbere, AU yabanje kubona doze miliyoni 270 z'inkingo izakura ku bazikora ikaziha ibihugu bigize umuryango, mu cyumweru gishize AU yavzue ko yabonye aho izakura izindi doze miliyoni 400 za AstraZaneca.
Ibihugu bimwe bya Africa byatangiye gukingira birimo Misiri, Guinea, Morocco na Seychelles.
Africa y'Epfo, ifite umubare munini w'abapfa n'abandura iki cyorezo muri Africa, kuwa mbere nibwo yakiriye ikiciro cya mbere cy'inkingo ariko gahunda yo gukingira ntiratangira.
Ibihugu byinshi bya Africa bizabona inkingo muri gahunda mpuzamahanga ya Covax, itandukanye n'iyi ya AU, gusa hari n'ibiteganya kwivuganira n'inganda zikora inkingo.
Ibihugu bimwe bya Africa nk'u Burundi, Eritrea, Gabon, Lesotho, Madagascar na Tanzania ntibiri ku rutonde rw'agateganyo rw'ibizahabwa inkingo muri gahunda ya Covax.
OMS ivuga ko ibihugu bitari kuri urwo rutonde rwatangajwe kuwa gatatu "byiguriye inkingo ubwabyo, ntibyazisabye, cyangwa se ntibirashyirwa mu bazazihabwa".
Covax igamije gufasha ibihugu bikennye kubona inkingo kuko hari impungenge z'uko ibihugu bikize biri kuzigwizaho ku buryo ibi bishobora kuburiramo.
BBC
