Harimo izifite ubushobozi bwo gukora isuku no kwica virusi ya corona mu bitaro, mu masoko n'ahandi hahurira abantu benshi.
Izi robots zose uko ari 3 zifite agaciro ka miliyoni 210 mu mafaranga y'u Rwanda.
Ubuyoboz bwa UNDP bwagize buti: 'Robo nshyashya z'Ikigo THOR UVC zizifashishwa mu gusukura ku bigo bivurirwamo abarwayi ba COVID-19, ku bitaro ndetse n'ahandi hantu hahurira abantu benshi nk'amasoko, ibiro cyangwa imipaka hagamijwe guhagarika ikwirakwira rya COVID-19.'
Zije zisanga izindi 5 zatanzwe n'uyu muryango UNDP muri Gicurasi 2020, zifite agaciro ka miliyoni 180.
Muri Gicurasi 2020,nibwo minisiteri y'ubuzima yakiriye 'Robots' eshanu zo gukora mu bigo bibiri bikurikirana abarwayi ba Covid-19 mu Rwanda.
Akazuba, Ikirezi, Mwiza, Ngabo na Urumuri ni yo mazina y'izo 'robots' zikora mu gupima umuriro, guha abarwayi ibyo bakenera no kubika amakuru y'abarwayi ba Covid-19.
Ibi bikoresho by'ikoranabuhanga bisimbura abantu ku mirimo imwe n'imwe, minisiteri y'ubuzima ivuga ko bifite ubushobozi bwo gupima abantu hagati ya 50 na 150 mu munota umwe.
Zishobora kandi kubwira abakozi bari ku kazi aho zibonye ibipimo bidasanzwe ku murwayi.
Mu bindi izi robots zikora harimo kuburira umuntu wambaye nabi agapfukamunwa, no guhuza umuganga n'umurwayi mu buryo bw'iyakure bwa 'video conference' nk'uko umukozi muri minisiteri y'ubuzima yabibwiye BBC icyo gihe.
Uyu mukozi yavuze ko umumaro ukomeye w'izi 'robots' ahanini ari ukugabanyiriza abaganga ibyago byo kwandura Covid-19 zibarinda guhura kenshi n'abarwayi.
