Minisiteri y'Ubuzima yatangaje ko kuri uyu wa Gatatu, abantu babiri bishwe na COVID-19 mu Rwanda.
Uyu munsi habonetse abarwayi bashya 131, hakira abandi 131 aho abamaze gukira bangana na 92.1%.
Abakirwaye ni 1,368 barimo babiri barembye. Hakingiwe abashya 3,906 bityo abamaze gukingirwa baba 348,629.
Minisitiri w'Ubuzima mu Burundi yatangaje ko bazabanza gutegereza hagakorwa ubushakashatsi bwimbitse kugira ngo bamenye niba inkingo za Covid-19 zizewe kugira ngo babone kuzikoresha mu gihugu.
Iki gihugu gitangaje ibi nyuma y'uko kuva mu ntangiro z'uyu mwaka wa 2021, ibihugu bitandukanye ku Isi byatangiye gukingira abaturage babyo icyorezo cya Covid-19, ndetse byagaragaje ko izo nkingo zizewe ku kigero cyo hejuru cyane.
Dr Thaddée Ndikumana uyobora iyi Minisiteri yavuze ko igihugu 'kitarwanya inkingo' ariko ko nta cyizere ku ngaruka zishobora guterwa nazo.
Ati 'Urebye igipimo cy'abantu bakira iyi ndwara, twahisemo gutegereza.'
Yakomeje avuga ko 96% by'abantu bandura aka gakoko ka Coronavirus bakira badahawe izi nkingo.
BBC dukesha iyi nkuru yatangaje ko ibihugu byo mu karere birimo u Rwanda, Uganda na Kenya byatangiye ibikorwa byo gukingira abaturage babyo.
Kugeza ubu u Burundi bumaze gutangaza ku mugaragaro abantu 2.618 banduye Coronavirus, mu gihe abamaze guhitanwa nayo ari batandatu kuva umuntu wa mbere ufite ibimenyetso by'iki cyorezo yagaragara muri iki gihugu muri Werurwe umwaka ushize.
Minisitiri yamaganye abashinja guverinoma kudatangaza amakuru y'ukuri arebana n'imiterere ya Covid-19, ko umubare w'abanduye ushobora kuba mwinshi, avuga ko bishingiye ku mubare w'abantu basuzumwe kandi bapimwe neza n'ibitaro.
