Amakuru mashya kuri Covid-19 uyu munsi:
Habonetse abanduye bashya:87
Abanduye bose:19,198
Hakize:97
Abakize bose:17,569
Abamaze gupfa bose:265
Abakirwaye:1,364
Abarembye:9
Indege ya kompamyi ya KLM yageze mu Rwanda itwaye inkingo 102,960 zo mu bwoko bwa Pfizer,z'icyiciro cya kabiri gikurikira izingana na 240,000 zo mu bwoko bwa AstraZeneca zahageze mu gitondo.
Minisitiri w'Ubuzima Dr.Ngamije Daniel niwe wakiriye izi nkingo za COVID-19 102,960 zo mu bwoko bwa Pfizer zagejejwe mu Rwanda ku bufatanye bwa COVAX.
Indege itwaye doze 240,000 z'urukingo rwa AstraZeneca muri gahunda ya Covax yageze i Kigali mu gitondo kuri uyu wa gatatu, nk'uko bivugwa na minisiteri y'ubuzima.
Muri iyo gahunda kandi mu ijoro ryacyeye, Kenya yakiriye doze miliyoni 1.02 z'uru rukingo rwa AstraZeneca, na DR Congo yakira doze miliyoni 1.7 z'urwo rukingo.
Uyu munsi nimugoroba u Rwanda rurakira izindi doze 102,960 z'urukingo rwa Pfizer, nk'uko bivugwa na minisiteri y'ubuzima mu itangazo yasohoye.
Iyi minisiteri yatangaje ko izo doze zose zizaterwa abantu 171, 480 bashyizwe mu cyiciro cy'abafite ibyago byinshi, mu gihe gukingira bitangira ku wa gatanu w'iki cyumweru.
Perezida Paul Kagame ku rubuga rwa Twitter yavuze ko ari inkuru nziza kuba inkingo za Covid-19 zigeze muri Africa, zihereye muri Ghana uyu munsi zikaba zageze no ku Rwanda.
Ati: "Kwari ugutegereza cyane, bamwe biteguye kurusha abandi.... tutanavuze 'abaruta abandi' nyamara twese turukeneye cyane."
Gukingira muri ibi bihugu biteganyijwe ko bihera ku bakozi bo mu nzego z'ubuzima, n'abakozi b'inzego zihutirwa hamwe n'abafite ibyago byinshi byo kwibasirwa n'iki cyorezo.
Mu itangazo, Minisitiri w'ubuzima Dr Daniel Ngamije yavuze ko bafite "intego yo gukingira 30% by'abaturage b'u Rwanda kugera mu mpera ya 2021, na 60% kugera ku mpera ya 2022".
Covax ni gahunda ishyigikiwe na UN/ONU yahurije hamwe ibihugu bikagura inkingo ku nganda zazikoze hagamijwe cyane cyane kuzigeza ku bihugu bidafite amikoro yo kuzigurira ku isoko.
Iyi gahunda iteganya gutanga doze miliyari ebyiri ku bihugu 190 mu gihe kitarenze umwaka.
