Kuri uyu wa Kane tariki ya 4 werurwe 2021, Yvonne Idamange Iryamugwiza yasomewe ibyaha aregwa uko ari bitandatu avuga ko byose abihakana.
Ibyaha aregwa ni guteza imvururu n'imidugararo muri rubanda, gutesha agaciro ibimenyetso bya jenoside, gukwirakwiza ibihuha hakoreshejwe ikoranabuhanga, gutambamira ishyirwa mu bikorwa rya gahunda za leta, gukubita no gukomeretsa no gutanga 'chèques' za banki zitazigamiye.
Ni iburanisha ririmo kuba hakoreshejwe ikoranabuhanga bita Video Conference. Mu buryo bwo kwirinda ikwirakwira ry'ubwandu bwa coronavirus.
Idamange ni umwe mu bantu bavuzwe cyane mu minsi mike ishize nyuma y'uko atangarije kuri YouTube.
Muri Gashyantare, 2021 nibwo  Madamu Idamange yashyize video kuri YouTube asaba abantu bazahurira ku Biro by'Umukuru w'igihugu i Kigali bakigaragambya.
Icyo gihe yavuze kandi ko Perezida Paul Kagame atakiriho. Nyuma y'igihe gito, Polisi y'u Rwanda, mu itangazo yashyize ahagaragara, yagaragaje ko guhera tariki ya 31 Mutarama 2021 ari bwo Idamange yatangiye kugaragaza imyitwarire y'uruhurirane rwa Politiki, kwijandika mu byaha n'ubusazi, byose yagiye anyuza ku mbuga nkoranyambaga.
Ntibyatinze  ku bufatanye bwa RIB na Polisi y'u Rwanda Idamange yatawe muri yombi, akurikiranyweho kugerageza guteza imyigaragambyo, guhangana n'abaje kumuta muri yombi mu nzira zubahirije amategeko, no gukubita umwe mu bashinzwe umutekano baje kumuta muri yombi.
Polisi y'u Rwanda yavuze ko yakubise icupa mu mutwe umwe mu baje kumufata akamukomeretsa, ku buryo yahise ajyanwa ku Bitaro bya Kacyiru kugira ngo yitabweho n'abaganga.
Madamu Idamange, n' umubyeyi w'abana bane w'imyaka 42.
Yvonne Idamange (iburyo) avugana n'umwunganizi we mu matageko Gashema Félicien, mu iburanisha ryo kuri uyu wa kane
Kugeza ubu iburanisha rirakomeje…
Source : https://impanuro.rw/2021/03/04/amakuru-mashya-idamange-yahakanye-ibyaha-aregwa/
