Umukandida ukomeye utavuga rumwe n'ubutegetsi muri Congo-Brazzaville ari mu bitaro kubera Covid-19 mu gihe amatora ya perezida arimo kuba kuri iki cyumweru tariki ya 21 Werurwe 2021.
Mu butumwa bwa videwo burimo guhererekanywa ku mbuga nkoranyambaga, Guy Brice Parfait Kolélas agaragara akanya gato yikuramo icyuma kimuha umwuka wo guhumeka wa oxygen, kugira ngo abwire abamushyigikiye ko 'arimo kurwana n'urupfu'.
Bwana Kolélas, ni umwe mu bakandida batandatu barimo guhatana na Perezida Denis Sassou Nguesso.
Abo mu muryango we bavuze ko barimo kugerageza kureba uko bamutegera indege akajyanwa kuvurirwa mu Bufaransa. Ku wa gatanu, Bwana Kolélas ntiyashoboye kwitabira igikorwa cye cya nyuma cyo kwiyamamaza, ku wa kane yari yavuze ko afite ubwoba ko yaba yarwaye malaria, nkuko bitangazwa n'ibiro ntaramakuru Associated Press.
Yajyanwe ku bitaro byigenga byo mu murwa mukuru Brazzaville, nyuma biza kwemezwa ko bamusanzemo Covid-19. Avuga mu Gifaransa, ari ku gitanda cyo mu bitaro, Bwana Kolélas yagize ati: 'Nshuti zanjye dusangiye igihugu, ndi mu bibazo. Ndimo kurwana n'urupfu. Ariko, mbasabye guhaguruka mukajya gutorera impinduka. Ntabwo naba nararwaniye ubusa…'.
Bwana Kolélas yaje ku mwanya wa kabiri mu matora aheruka yo mu 2016, abona amajwi 15%, mu gihe Bwana Sassou Nguesso yabonye amajwi 60%.
Bwana Sassou Nguesso, w'imyaka 77, abonwa ahanini nk'umutegetsi w'umunyagitugu witezweho kongera gutangazwa ko ari we watsinze aya matora.
Kugeza ubu, Congo-Brazzaville yatangaje abantu barenga 9,500 banduye coronavirus, muri bo abantu 134 yarabishe, nkuko imibare yakusanyijwe na Kaminuza ya Johns Hopkins yo muri Amerika ibigaragaza.
Abo mu muryango wa Guy Brice Parfait Kolélas bavuze ko barimo kugerageza kureba uko yajyanwa kuvurirwa mu Bufaransa
Src: BBC
Source : https://impanuro.rw/2021/03/21/ku-munsi-wamatora-umukandida-yajyanwe-mu-bitaro/
