Ikipe ya Manchester City yakubitiwe mu rugo na mukeba Manchester United,inanirwa kurenza imikino 21 ya Premier itsinda yikurikiranya.
Umutoza wa United,Ole,ukunze gutungurana yeretse City ko amaze kuyimenya kuko abaye umutoza wa mbere w'iyi kipe utsinze Manchester City inshuro 3 yikurikiranya amusanze ku kibuga cye.
Ole yahagaritse umuvuduko wa City abifashijwemo n'abakinnyi bitwaye neza nka Fred,Wan-Bissaka,Luke Shaw na Dean Henderson.
United yafunguye amazamu ku munota wa 02 w'umukino ibifashijwemo na Bruno Fernandes winjije penaliti ahanye ikosa ryakorewe kur Martial mu rubuga rw'amahina.
United yakoze amakosa make muri uyu mukino,yabonye igitego cya kabiri muri uyu mukino ku munota wa 50 ibifashijwemo na Luke Shaw ku mupira mwiza yahawe na Marcus Rashford.
N'ubwa mbere ikipe ya Manchester City yatsinzwe kuva muri Ugushyingo 2020,kuko yari imaze imikino 28 idatsindwa mu marushanwa yose.City iracyari ku mwanya wa mbere aho irusha United amanota 11.
Mu batoza 67 bahuye na Pep Guardiola inshuro zirenze 3 mu marushanwa yose,Ole Gunnar Solskjær niwe umaze kumutsinda inshuro nyinshi kurusha izo amutsinze kuko Ole amaze kumutsinda 4 kuri 3.
Ku rundi ruhande,Liverpool yongeye gutsindirwa mu rugo igitego 1-0 na Fulham cyatsinzwe na Mario Lemina ku munota wa 45, uyu ukaba ari umukino wa 6 itsindiwe mu rugoyikurikiranya.
Liverpool yaherukaga gutsindwa imikino 6 mu rugo muri shampiyona mu mwaka wa 1953-54,icyo gihe yaramanutse,ni nabwo iheruka kujya mu cyiciro cya kabiri.
Liverpool yahabwaga amahirwe yo gutwara igikombe cya shampiyona uyu mwaka,ishobora kutabona amahirwe yo kuza mu makipe 4 ya mbere ahubwo ikerekeza muri Europa League.
