Minisiteri y'Ubuzima yatangaje ko uyu munsi abantu 76 banduye COVID-19 mu Rwanda mu bipimo 5.730 byafashwe. Hakize abantu 170 mu gihe nta muntu n'umwe yahitanye.Abarembye ni 6.
Abaturarwanda barasabwa kutirara kuko icyorezo kigihari ndetse hakomeje gufatwa ingamba nshya zigamije gukumira ikwirakwizwa ryacyo, harimo no kwirinda ingendo zitari ngombwa no kwirinda kujya ahantu hahurira abantu benshi kandi hafunganye.
Mu bimenyetso biranga umuntu urwaye Covid-19 nyuma yo kugira umuriro, kuribwa umutwe no gukorora, harimo gutakaza impumuro ku buryo ushobora guteka ibiryo byashirira ntubimenye cyangwa umuntu yagucaho yiteye umubavu ntuhumurirwe.
Nyuma y'uko ibi bibaye ku barwaye Coronavirus, benshi impumuro yabo yaragarutse ariko biza kugaragara ko umuntu umwe muri batanu atongera guhumurirwa mu byumweru umunani nyuma yo kurwara.
Imwe mu miti yakoreshejwe mu kuvura iki kibazo ni uwitwa corticostéroïdes usanzwe uvura indwara ya Asthma.
Inzobere imwe mu zakoze ubushakashatsi kuri iki kibazo cyo gutakaza impumuro, Prof Carl Philpott, yavuze ko gutanga uyu muti atari igitekerezo cyiza kuko ushobora guteza ingaruka uwawuhawe zirimo no kugira umuvuduko w'amaraso.
Mu bushakashatsi bwatangajwe mu kinyamakuru mpuzamahanga gitangaza inkuru z'ubushakashatsi ku ndwara zifata imyanya y'ubuhumekero na Allergie, (International Forum of Allergy & Rhinology) bwagaragaje ko mu gihe umuntu yatakaje impumuro, icyiza ari ugukora imyitozo yo kwihumuriza kugira ngo ubwonko bwongere kwitoza kumenya impumuro z'ibintu bitandukanye.
Gukora imyitozo yo kwihumuriza, ni ugufata ibintu bine bifite impumuro yumvikana kuruta izindi birimo indimu cyangwa ironji, tungurusumu, ikawa, cyangwa ibibabi by'inturusu ya eucalyptus, ukabyihumuriza inshuro ebyiri ku munsi mu gihe kinini.
Prof Carl Philpott yavuze ko ubushakashatsi bwagaragaje ko 90% by'abantu bakora uyu mwitozo, bagarura impumuro nyuma y'amezi atandatu.
Ati 'Ibi bigamije gufasha ubwonko kwishyira ku murongo, bugasubiza mu gihe bwumvise ikintu kidasanzwe.'
Mu gihe bikomeje kwanga, uwagize iki kibazo asabwa kugana kwa muganga bakamukorera ibizamini kuko ashobora kuba yarafashwe na zimwe ndwara zo gutakaza impumuro zirimo anosmie, Hyposmie, parosmie cyangwa fantosmie.
