Ikigo cy'imisoro n'amahoro muri Uganda(URA) cyasabye Robert Kyagulanyi uzwi nka Bobi Wine mu muziki wiyamamarizaga kuyobora Uganda kwishyura amashilingi ya Uganda angana na miliyoni 337 nk'umusoro w'imodoka ye itinjirwa n'amasasu(bullet-proof car).
Mu ibaruwa yohererejwe ubuyobozi bw'ishyaka NUP ari naryo Bobi Wine abarizwamo, babamenyesheje ko nyuma yo kongera gusuzuma basanze imodoka ya Bobi Wine ari imodoka itinjirwa n'amasasu aho bo bayifataga nk'imodoka isanzwe bakayishyuza imisoro mike.
Iyi baruwa yasinyweho na Mr Abel Kagumire akaba komiseri muri URA, iragira iti'hakurikijwe isuzumwa ryongeye gukorwa ku modoka Toyota Land Criser V8 Reg. UBJ667 F, byemejwe ko ifite ubwirinzi. Bigaragaza ko ubwirinzi bwayo(ballistic protection) ari 90mm na 6mm.'
Bakomeje bavuga ko ubwo bazanaga iyi modoka muri Gashyantare 2021 bavuze ko ari imodoka isanzwe kandi nyamara atari byo ahubwo yo itinjirwamo n'amasasu ibintu bitandukanye n'itegeko 203 ry'umuryango w'Afurika y'Uburasirazuba ryo mu Kwakira 2004.
Bamubwiye kandi ko bakoze isuzuma ry'ibishoboka byose basanga iyi modoka ye ihagaze ibihumbi 166,700 by'Amadorali akaba agomba kuyishyurira imisoro ingana na 337,698,776 z'amashilingi ya Uganda.
Bakaba bamusabye kujya kureba komiseri w'ungirije muri URA bakumvikana uburyo azagenda yishyura iyi misoro mu byiciro bakaba bamurekurira imodoka ye.
Bwa mbere iyi modoka igera muri Uganda yari yahawe agaciro ka miliyoni 157 z'amashilingi ya Uganda, akaba yaravuga ko ari impano yahawe n'abamushyigikiye baba mu mahanga mu rwego rwo kumufasha kwiyamamaza neza.
Source : http://isimbi.rw/imyidagaduro/article/bobi-wine-yaciwe-arenga-miliyoni-300
