Minisiteri y'Ubuzima mu Rwanda yatangaje ko kuri uyu wa Kabiri tariki 6 Mata 2021, abantu batatu bahitanywe na Covid-19 mu gihe 178 bashya bayanduye.
Babiri bitabye Imana ni abagore babiri b'imyaka 79 na 68 n'umugabo w'imyaka 61 b'i Kigali. Batumye umubare w'abamaze guhitanwa na Covid-19 mu Rwanda uba 314.
Guhera muri Werurwe 2020 abamaze kwandura bose ni 22 862. Minisante yatangaje ko mu masaha 24 ashize hakize abarwayi 11, bituma abamaze gukira bose baba 20 705. Abakirwaye ni 1843 barimo bane barembye.
Abakingiwe guhera muri Werurwe 2021 ni 348926.
Uturere twabonetsemo abarwayi bashya benshi ni Huye 45, Nyamagabe 36, Gisagara 30, Ruhango 17, Kigali 11, Nyaruguru 10, Karongi 5, Rwamagana 5.
Amakuru yose ya Covid-19 kuri uyu wa Kabiri:
Habonetse abanduye bashya:178
Abanduye bose:22,862
Hakize:111
Abakize bose:20,705
Hapfuye:3(Abagore 2 b'imyaka 79&68 n'umugabo w'imyaka 61 baguye i Kgl)
Abamaze gupfa bose: 314
Abakirwaye:1,843
Abarembye:4
Abakingiwe bashya:0
Abakingiwe kuva ku wa 05/3/2021:348,926
Minisiteri y'Ubutegetsi bw'Igihugu, Minaloc, yatangaje ko hashingiwe ku miterere y'icyorezo cya Covod-19, imirenge itandatu yo mu turere twa Huye, Gisagara na Nyaruguru ishyizwe muri gahunda ya Guma mu Rugo [Lockdown] izamara ibyumweru bitatu.
Itangazo ryashyizwe ahagaragara na Minaloc, kuri uyu wa Kabiri tariki 6 Mata 2021, rivuga ko ibyo bice bishyizwe muri Guma mu Rugo nyuma y'isesengura ryakozwe n'inzego z'Ubuzima ku cyorezo cya Covid-19 m Ntara y'Amajyepfo by'umwihariko uturere dutatu.
Imirenge yashyizwe muri gahunda ya Guma mu Rugo ari iya Ruhashya, Rwaniro yo mu Karere ka Huye, Umurenge wa Gikonko, Kansi na Mamba yo mu Karere ka Gisagara ndetse n'Umurenge wa Ruramba wo mu Karere ka Nyaruguru.
Minaloc yavuze ko abatuye muri iyi mirenge yashyizwe muri Guma mu Rugo bagomba gukomeza kubahiriza amabwiriza agenga iyi gahunda. Ni mu gihe amasoko acuruza ibiribwa yemerewe gukora ariko umubare w'abayajyamo ugomba kugabanywa.
Ikomeza igira iti 'Muri iyi mirenge insengero zose zirafunze, icyakora imirenge yashyizwe muri guma mu rugo mu turere twa Gisagara, Huye na Nyaruguru, umunsi wo gusenga ni umwe mu cyumweru aho kuba ibiri.'
Mu yandi mabwiriza yashyiriweho iyi mirenge itandatu harimo kuba imirimo ikoresha abantu benshi hazajya hakora 50%, y'abakozi kandi abemerewe gukora babanze kwemezwa n'itsinda ribishinzwe ryashyizweho n'Akarere mu kurwanya Covid-19, nyuma yo gusuzuma ubwihutirwe bwayo.
Minaloc yakomeje igira iti 'Imirimo yo kubaka Gisagara Peat Power Plant mu Karere ka Gisagara ibaye ihagaze, hazasigara hakora abakozi b'ingenzi babanje gupimwa Covid-19 ndetse bakanacumbikorwa mu kigo.'
Inzego z'ibanze n'iz'umutekano zasabwe gukurikirana ishyirwa mu bikorwa ry'aya mabwiriza.
Minisiteri y'Ubutegetsi bw'Igihugu kandi yasabye Abanyarwanda bose gukomeza kubahiriza amabwiriza yo kwirinda Covid-19, yatanzwe n'inzego z'ubuzima no gutanga amakuru mu gihe hagize ugaragaza ibimenyetso bya Coronavirus bahamagara ku murongo wa 114 washyizweho na Minisiteri y'Ubuzima.
