Kimwe n'andi makipe yose ari mu Cyiciro cya Mbere, Rayon Sports yemerewe kongeramo abakinnyi bashya kugeza tariiki ya 29 Mata 2021.
Kuri uyu wa Gatandatu, ibinyujije kuri Twitter, iyi kipe yatangaje ko yasinyishije Muhire Kevin wakinaga muri Oman, ariko Shampiyona yaho ikaba yarahagaritswe n'icyorezo cya COVID-19.
Muhire Kevin wakiniye Rayon Sports hagati ya 2015 na 2019, yayivuyemo ajya gukina mu Misiri, ahava muri uyu mwaka, yerekeza muri Oman.
Undi mukinnyi Rayon Sports yasinyishije ni Umunye-Congo, Nzinga Héritier Luvumbu w'imyaka 26. Yakinaga muri Maroc, aho yageze muri 2018 agiye muri AS FAR batandukanye muri 2019 akajya muri Youssoufia Berrechid yakiniraga kugeza ubu.
Luvumbi wari kumwe na Repubulika Iharanira Demokarasi ya Congo muri CHAN 2016 mu Rwanda, yakiniye kandi Union SG yo mu Bubiligi na AS Vita Club y'iwabo.
Rayon Sports iri mu itsinda B rya Shampiyona, izatangirira kuri Gasogi United tariki ya 2 Gicurasi, iminsi itatu mbere yo guhura na Kiyovu Sports mu gihe izasoreza kuri Rutsiro FC tariki ya 8 Gicurasi 2021.
Mu kwitegura iyi mikino, imaze gukina umukino umwe wa gicuti, aho yatsinze Bugesera FC ibitego 2-0 ku wa Gatatu mu gihe ishobora gukina na Police FC undi mukino wa gicuti ku Cyumweru cyangwa ku wa Mbere tariki ya 26 Mata 2021.
Luvumbu mu mwambaro mushya wa Rayon Sport izambara uyu mwaka w' imikino.
Muhire kevin mwisura nshya muri Rayon Sport agarutsemo avuye muri Saham Club.
Comments
0 comments
Source : https://yegob.rw/rayon-sports-yasinyishije-luvumbu-na-muhire-kevin-amafoto/
