Kimwe mu bitangazamakuru bikomeye hano mu Rwanda cyatangaje ko Oumar Sidibe yatsinze uru rubanza aho Rayon Sports yategetswe kumwishyura agera kuri miliyoni 12 FRW ariko muri FERWAFA bavuga ko iki kibazo kitarakemurwa.
Mu kiganiro umuvugizi w'ungirije w'ishyirahamwe ry'umupira w'amaguru mu Rwanda,Jules Karangwa, yahaye UMURYANGO,yavuze ko ibi atari ukuri kuko umwanzuro uzafatwa mu cyumweru gitaha.
Yagize ati "Ayo makuru ntabwo ari ukuri.Umwanzuro kuri icyo kirego uzafatwa mu cyumweru gitaha."
Sidibe usanzwe ari kapiteni wungirije wa Rayon Sports,yanze icyemezo ubuyobozi bw'ikipe bwafashwe mu mezi ashize ubwo bwagabanyirizaga imishahara abakozi bagashyirwa kuri 30% ndetse akaba yarahise arega asaba ko yishyurwa.
Kuba Rayon Sports yari yarasubitse amasezerano y'abakozi bayo hagati ya Mata na Kanama 2020 ni byo byatumye ifata icyemezo cyo kugabanya umushahara, aho kongera kuyasubika kandi Itegeko ry'Umurimo mu Rwanda ribiteganya mu gihe kitarenze iminsi 90 mu mwaka umwe.
Ubwo Minisiteri ya Siporo yahagarikaga shampiyona kuva ku wa 12 Ukuboza 2020, ubuyobozi bwa Rayon Sports bwaganyije imishahara y'abakinnyi bayo hemezwa ko bazajya bahembwa 30% by'umushahara uhereye muri Mutarama kugeza igihe imyitozo izasubukurirwa gusa bivugwa ko abanyamahanga babyanze barimo na Sidibe.
Oumar Sidibé yafashe icyemezo cyo kudakora imyitozo yo gusubukura shampiyona, mu gihe hakomeje kwitegurwa Shampiyona izatangira kuwa 01 Gicurasi 2021.
Rayon Sports iri mu itsinda B rya shampiyona izakinwa mu buryo bwihariye hamwe na Kiyovu Sports, Gasogi United na Rutsiro FC.Izatangira shampiyona ikina na Gasogi United kuwa 02 Gicurasi.
