Minisitiri w'Ubuzima yatangaje ko kuri iki Cyumweru, umugabo w'imyaka 60 wo mu mujyi wa Kigali yishwe na COVID-19 bituma umubare w'abamaze gupfa bagera kuri 315. Hari hashize iminsi 4 yikurikiranye ntawicwa n'iki cyorezo.
Uyu munsi habonetse abarwayi bashya 83 mu gihe abakize ari 171 batumye abamaze gukira bagera kuri 90.6%.Abakirwaye ni 1,868 barimo batanu barembye.
Amakuru yose kuri Covid-19 mu Rwanda
Habonetse abanduye bashya:83
Abanduye bose:23,426
Hakize:171
Abakize bose:21,243
Abakirwaye:1,868
Abarembye:5
Abakingiwe bashya:0
Abakingiwe kuva ku wa 05/3/2021:348,926
Umuryango wa Afurika yunze Ubumwe wahagaritse gahunda yo kugura inkingo za AstraZeneca zikorerwa mu Buhinde, kubera uburyo ubu bigoye kuzibona, ijya mu biganiro byo kugura iza Johnson & Johnson zitangwaho dose imwe umuntu akaba akingiwe byuzuye.
Umuyobozi w'Ikigo Nyafurika gishinzwe Kurwanya Indwara (CDC), John Nkengasong, yabwiye Financial Times ko guhagarika kugura izo nkingo ntaho bihuriye n'ibibazo zavuzweho byo kuvura kw'amaraso ko ahubwo ari ukwanga 'guhangana na gahunda ya Covax [igamije gufasha ibihugu bikennye kubona inkingo]'.
Yavuze ko muri Covax hazakoreshwa inkingo nyinshi za AstraZeneca kandi zizazanwa ahanini muri Afurika, bityo ko batakomeza gusa n'abarushanwa basaba izo nkingo zitari no kuboneka ku bwinshi.
Yakomeje ati 'Intego yacu ni ugukingira 60%. Niba Covax izadufashaho 20%, dushobora gukomeza gushaka izindi nkingo zo kongeraho. Niba Covax iri gukorana na AstraZeneca ngo ibone dose ikeneye, dushobora kumvikana na Johnson & Johnson kugira ngo tubone izisigaye.'
Uretse kuba inkingo zizifashishwa muri Covax ari iza AstraZeneca, u Buhinde buherutse kugabanya izoherezwa hanze kugira ngo habanze hihutishwe ikingira ry'imbere mu gihugu, ibintu bikomeje gutuma urwo rukingo rutaboneka cyane kuko ariho zikorerwa.
Johnson & Johnson iherutse gutangaza ko izaha Afurika inkingo miliyoni 400.
Ibihugu bya Afurika biracyafite umuvuduko uri hasi mu bikorwa byo gukingira, biturutse ahanini ku mbogamizi zo kubona inkingo.
Abasaga miliyoni 4,4 ni bo bamaze kwandura COVID-19 muri Afurika, muri bo miliyoni 3,9 barayikize naho abarenga ibihumbi 115 imaze kubahitana.
