Ubwo bageraga imbere y'Urukiko rwisumbuye rwa Gasabo, usibye Iyamuremye Jean Clement (murumuna wa Jay Polly) uburana yemera icyaha, abandi bose bongeye gushimangira ko barengana ndetse ko n'uburyo bafunzemo bunyuranyije n'amategeko.
Jay Polly yavuze ko yatawe muri yombi tariki 23 Mata 2021 bagezwa imbere y'Ubushinjacyaha tariki 29 Mata 2021, iminsi igenwa n'amategeko yarenze. Yavuze ko atemera ibyo Ubushinjacyaha buvuga ko batawe muri yombi tariki 25 Mata 2021.
Bimwe mu bimenyetso Jay Polly n'abunganira abaregwa bifashishije basobanurira umucamanza, ni inkuru yanditswe ku rubuga rwa Polisi y'u Rwanda igaragaza ko batawe muri yombi tariki 23 Mata 2021.
Indi mpamvu uyu muraperi yavuze ko yatumye ajurira, ni uko urumogi bamushinja rwaguzwe rukananyobwa atari mu rugo iwe, kukongo icyo gihe yari yagiye muri studio.
Jay Polly yongeye kubwira Urukiko ko ariwe wafunguriye aba polisi bagiye kubafata iwe.
Ati 'Iyo nza kuba nzi ko iwanjye hari urumogi ntabwo nari gufungurira Polisi ntabanje gusibanganya ibimenyetso.'
Uyu muraperi yashimangiye ko nta ruhare yagize mu igurwa cyangwa ibikwa ry'urumogi rwafatiwe iwe. Ku bijyanye n'urumogi bamusanganye mu mubiri ubwo yapimwaga, yavuze ko ari urwo yanyweye kera. Aha yasubiyemo ibyo yavugiye mu rukiko rw'ibanze, ashimangira ko urwo bamusanzemo yarunyweye kuva mu 2012 kugeza muri Nyakanga 2020.
Iki gihengo yaruhagaritse bitewe n'impanuka yakoze amaraso akanga guhagarara.
Jay Polly kandi yabwiye Urukiko ko atumva impamvu batigeze babapima mu maraso ahubwo bagahitamo gupima inkari.
Ati 'Mu maraso ushobora kubona umuntu uheruka kunywa urumogi vuba, ariko mu nkari no mu musatsi biragoye kuko ibisubizo bigaragaza n'umuntu uheruka kurunywa cyera cyane.'
Indi mpamvu Jay Polly yabwiye Urukiko ko yatumye ajurira, ni uko atiyumvisha ukuntu Urukiko rw'Ibanze rwanze umwishingizi we nyamara ari mukuru we, uzwi, ufite aho akorera hazwi ndetse nta n'icyo yigeze asabwa ngo agaragaze ko atazagishobora.
Jay Polly kandi yagaragaje ko we na bagenzi be bagambaniwe n'uwitwa Kaboko bafatanywe ariko we akaba adafunze kandi ashinjwa mu banywereye urumogi iwe.
Uyu mugabo Kaboko Jay Polly yavuze ko aherutse kumutumaho aba Polisi b'aho afungiye, ababwira ko asaba imbabazi uyu muraperi kuko mu by'ukuri atari we yari agambiriye ko bafata.
Jay Polly kandi yatakambiye Urukiko rwisumbuye rwa Gasabo arusaba kumurekura by'agateganyo, kuko afite abana babiri bakiri bato, biga mu myaka yo hasi kandi bose ari we ubitaho.
Kimwe n'abo bareganwa muri dosiye imwe, bagaragarije Urukiko rwisumbuye rwa Gasabo ko batanyuzwe n'imikirize y'Urukiko rw'ibanze rwa Gasabo, kuko birengagije ubwiregure bagiye bagaragaza.Ikindi bagaragaje ni uko nta mpamvu zikomeye zihari zatuma baburana bafunze.
Beretse Urukiko ko baramutse barekuwe, nta bimenyetso basibanganya ndetse ko badashobora gutoroka ubutabera.
Ubushinjacyaha muri uru rubanza bwasabye Urukiko rwisumbuye rwa Gasabo kuzita ku byo bwari bwagaragarije Urukiko rw'ibanze rwa Gasabo bityo bakazafata icyemezo gikwiye.
Umuraperi Jay Polly aregwa hamwe na murumuna we Iyamuremye Jean Clément, Shemusa Mutabonwa na Hatunga Fidèle Benedicto uvuga ko ari Umunyamerika ukomoka muri Tanzania.
