Ishyirahamwe ry'umupira w'amaguru mu Rwanda 'FERWAFA', ryamaze gutumira abayobozi b'amakipe y'icyiciro cya mbere uko ari 16 mu nama izigirwamo uburyo shampiyona izakomeza.
Shampiyona y'icyiciro cya mbere mu Rwanda umwaka w'imikino 2020-2021, yateguwe mu buryo bw'amatsinda, amakipe uko ari 16 yagabanyijwe mu matsinda 4.
Buri tsinda rigomba gutanga amakipe 2 azamuka akaba 8 ubundi agahatanira igikombe, abiri ya mbere akaba ari yo azahagararira u Rwanda mu mikino Nyafurika ya CAF Champions League na Confederations Cup.
Amakipe abiri ya nyuma mu itsinda nayo azakora shampiyona yayo yishakemo 2 amanuka mu cyiciro cya kabiri. Iyi mikino yose hakazakinwa umukino umwe, ntayo kwishyura iteganyijwe.
Nyuma y'uko ejo hashize ku wa Mbere hasojwe imikino y'amatsinda ariko hakaba hasigaye umukino w'ikirarane uzakinwa ku wa Kane wa AS Muhanga na Bugesera uzasiga hamenyekanye indi kipe izamuka, FERWAFA yamaze gutumizaho inama y'abayobozi b'amakipe y'icyiciro cya mbere mu bagabo.
Nk'uko bigaragara mu ibaruwa ISIMBI yabonye yasinyweho n'umunyamabanga wa FERWAFA, Uwayezu Francois Regis, yatumiye aba bayobozi mu nama izigirwamo uko shampiyona izakomeza ndetse banatombore ibibuga bizakinirwaho.
Iyo baruwa iragira iti'tubandikiye tugira ngo tubatumire mu nama iziga ku bijyanye n'uburyo imikino ya shampiyona 2021 izakomeza gukinwamo. Muri iyi nama hazakorwa tombola izagaragaza ibibuga bizakinirwaho imikino ikurikira.'
'Uburyo tombola izakorwamo muzabisobanurirwa mbere y'uko inama itangira. Inama izaba ku wa Kane tariki ya 20 Gicurasi 2021 saa tatu (09h00') kuri FERWAFA.'
Kugeza ubu amakipe yamaze kuzamuka ni APR FC, Rayon Sports, Rutsiro FC, AS Kigali, Police FC, Marines FC na Espoir FC, hasigaye kumenyekana ikipe imwe nayo izamenyekana ku wa Kane.
Source : http://isimbi.rw/siporo/article/ferwafa-yatumijeho-abayobozi-b-amakipe-16
