Mutebi Rashid wagiye uvugwaho ubusinzi bukabije mu makipe yose yakiniye,mu minsi ishize yatorotse umwiherero we na bagenzi be barimo ajya hanze gushaka inzoga kubera icyaka cyari kimwishe ndetse yemeye ko yamaze iminsi 2 hanze.
Mu ibaruwa yandikiye ubuyobozi bwa Musanze FC yasabye imbabazi yiha umuhigo utoroshye wo kutazongera kujya gushaka inzoga zamubase.
Ati"Ndabasuhuje mwese kandi mbashimira ibyo mwankoreye muri ibi bihe. Mbandikiye iyi baruwa nsaba imbabazi komite y'ikipe kuba naragiye hanze y'umwiherero nta ruhushya nkamarayo iminsi ibiri ntaragaruka. Ibyongeye kuri ibyo ndasaba imbabazi zo kunywa inzoga mu mwiherero kandi bibujijwe. Ndapfukamye nsaba imbabazi sinzabisubira."
Ubwo Mutebi yari yaburiwe irengero akongera kugaruka,uwari umutoza wa Musanze FC,Seninga Innocent, yamusabiye kwirukanwa mu mwiherero ntagaruke.
Ibibazo biri mu ikipe ya Musanze FC birakomeye cyane ko uretse kuba yarasezerewe mu makipe 8 ashaka igikombe cya shampiyona,umutoza Seninga yiyemeje kurega umuyobozi wayo Tuyishime Placide uzwi nka Trump wamwirukanye ku munota wa 63 mu mukino yatsinzwemo na Gasogi United ibitego 4-1.
Sninga yari yasabye ubuyobozi ko Mutebi atagaruka mu mwiherero, kugeza imikino ya shampiyona irangiye tariki ya 30 Kamena 202,no guhagarikirwa umushahara kugeza ku itariki ya 30 Kamena 2021.
