Ishimutwa ry'uyu mukire uri mu bakomeye mu Karere ka Rubavu, yashimuswe mu gitondo cyo kuri uyu wa Gatatu tariki 12 Gicurasi, akaba yarashimutiwe ahitwa Kimoko hakurya y'umujyi wa Goma.
Yashimuswe n'abarwanyi bitwaje intwaro bikekwa ko ari ab'Umutwe wa FDLR ubwo yari mu rugendo ari mu modoka mu gihe umwe mu bo bari kumwe yakomerekeye muri iki gikorwa.
Bivugwa ko uyu muherwe yari agiye kureba ibikorwa bye aho asanzwe abifite mu mujyi wa Goma.
Umuyobozi w'Imiryango itari iya Leta (Sosiyete Sivile) i Goma, Marion Ngavho yatangaje ko abamushimuse bari kwaka ibihumbi 100 USD kugira ngo bamurekure.
Marion Ngavho yagize ati 'Imodoka ye bayangije. Umugabo bari kumwe amuherekeje yakomerekejwe. Ibi bintu birarambiranye, turahamagarira abaturage kuba maso, kwamagana abajura bose, turasaba leta ko hashakishwa abatunze intwaro mu buryo butemewe.'
Bamwe mu bazi uyu mukire bemeza ko yashimuswe n'abasanzwe bamuzi ko ari umukire w'Umunyarwanda ku buryo bemeza ko ari abarwanyi b'umutwe wa FDLR urimo bamwe mu basize bakoze Jenoside Yakorewe Abatutsi banakunze guhungabanya umutekano w'u Rwanda.
UKWEZI.RW
