Aba baturage bareze umujyi wa Kigali nyuma yo kwanga ingurane bahawe ngo bimuke mu gace bari batuyemo. Gahunda yo gusenya inzu ziherereye muri aka gace kari mu twubatse nabi muri Kigali, hakubakwa mu buryo bugezweho yatangiye muri Nzeri 2017.
Aba baturage batanze ikirego mu rukiko rwisumbuye rwa Nyarugenge basaba umujyi wa Kigali kubaha ingurane ikwiriye hisunzwe amategeko. Aba baturage bose uko ari 25 bahawe nimero imwe y'urubanza kuko n'ubundi ikiregerwa ari kimwe.
Uru rubanza rumaze gusubikwa inshuro enye ku mpamvu zitandukanye zirimo iz'icyorezo cya Covid-19 no kuba umujyi wa Kigali wari utarabona abawuhagararira mu mategeko.
Inzego z'umutekano ziganjemo abapolisi bambaye impuzankano z'akazi barimo n'abapolisi bakuru kugera no ku uhagarariye iperereza ku rwego rw'umujyi wa Kigali n'abandi bari bambaye imyenda ya gisivili, bari bagose urukiko rwisumbuye rwa Nyarugenge.
Kwinjira mu rukiko buri wese yagombaga kubanza gusakwa, ibintu bitamenyerewe mu zindi manza.
Mu 2017 nibwo Umujyi wa Kigali watangaje gahunda yo kwimurira abatuye muri Bannyahe mu Murenge wa Busanza mu karere ka Kicukiro.
Hari abaturage bagaragaje ko batishimiye icyemezo cyafashwe cyo kubimurira mu nzu, ahubwo bo bagasaba ko bahabwa amafaranga bakishakira aho kuba bihitiyemo.
