Abantu babarirwa muri morongo bishwe mu bitero by'inyeshyamba ku wa mbere mu mujyi muto wa Boga na Kinyanjojo mu ntara ya Ituri muri Repubulila ya Demokarasi ya Congo.
Umuryango w'abaganga batagira umupaka (MSF) uvuga ko abasivile 10 bishwe ubwo ibitaro bya Boga byaterwaga, ibitaro biri muri 120Km mu majyepfo y'umujyi wa Bunia munini muri Ituri.
Indi mirambo myinshi y'abishwe bivugwa ko yabonywe nyuma y'uko abahinzi bagambiriwe muri ibi bitero by'abantu bitwaje intwaro bataramenyekana.
Radio Okapi y'umuryango w'abibumbye ivuga ko abantu bagera kuri 30 bose hamwe bishwe muri ibi bitero, mbere y'uko ingabo za leta zirasana n'abateye bagasubira inyuma.
Iyi radio ivuga ko abaturage benshi bo muri ako gace bavuye mu byabo bahunga ko abo barwanyi bashobora kugaruka kwihorera kubera ababo baguye mu mirwano.
Mathias Gillman, umuvugizi w'ingabo za MONUSCO ziri muri Congo mu butumwa bwo kugarura amahoro, yasabye ubufasha burenzeho ngo zibashe gucunga umutekano muri ako karere.
Yabwiye BBC ati: 'Aka gace kamaze igihe kinini kari mu kaga kuko kari kure cyane mu cyaro, ni ahantu hanini cyane hagoye kuhagera.
'Nta butegetsi bwa leta bucyenewe buriyo, ariyo mpamvu ingabo za MONUSCO ziri gushaka uko zakwiyongera mu kuhaba. Ariko iby'ingenzi cyane turi gusaba ni uko ingabo na polisi ba Congo nabo bahongera abasirikare n'abapolisi babo.'
Radio Okapi ivuga ko abarokotse ibi bitero bavuga ko amaduka (boutiques) yasahuwe kandi ko inzu y'ibitaro bya Boga yatabawe itarakongorwa n'inkongi y'umuriro.Umuvugizi w'ingabo mu ntara ya Ituri avuga ko umusirikare umwe wa leta yakomeretse byoroheje muri iyo mirwano.
Inkuru ya BBC
Source : https://impanuro.rw/2021/06/10/dr-congo-abantu-benshi-bishwe-mu-bitero-byinyeshyamba/
