Uru rugendo ku duce tw'amateka yo kubohora u Rwanda rwateguwe na sosiyete itembereza ba mukerarugendo mu bice bitandukanye by'u Rwanda izwi nka MB Simba Safarid Rwanda Ltd.
Ruzaba tariki 03-04 Nyakanga 2021, mu gihe u Rwanda ruzaba rwizihiza Umunsi wo Kwibohora.
Ibyamamare bitandukanye birimo umuhanzi Jules Sentore, umuhanzikazi Alyn Sano, Ruti Joel, Yago, umunyarwenya Clapton, Cycy Beauty ugaragara mu ndirimbo 'Atensiyo' ya Platini, Abanyamakuru David Bayingana na Rugangura Axel, Producer Bob, Teta Hence wegukanye ikamba ry'umushinga wahize indi muri Miss Rwanda 2021, ni bamwe mu bamaze kwiyandikisha kwitabira uru rugendo.
Abazitabira uru rugendo shuri bazaba bambaye ekuteri zibafasha kugenda bumva umuziki. Indirimbo zitandukanye zivuga ku rugamba rwo kubohora u Rwanda n'izindi zizacurangwa na Dj Sonia na Dj Rugamba mu gihe cy'iminsi ibiri.
Mu bandi bagaragaje ko bazitabira uru rugendo shuri ruzabera kuri Muhanzi Beach Resort n'ahandi barimo n'umuhanzi akaba n'umunyamakuru Uncle Austin, Patience Pacha, Tracy n'abandi.
Kwitabira uru rugendo bisaba kwishyura ibihumbi 100 Frw ku muntu umwe, n'ibihumbi 160 ku bakundana (Couple).
Muyoboke Alex uri mu bari gutegura uru rugendo, yabwiye INYARWANDA, ko muri aya mafaranga hakubiyemo buri kimwe uwishyuye azakenera mu rugendo shuri. Harimo ibyo kurya, aho kuryama n'ibindi.
Yavuze ko bitewe n'ingamba zo kwirinda Covid-19, abazitabira uru rugendo shuri bazipimisha Covid-19. Avuga ko rwateguwe kugira ngo abantu bamenye bihagije amateka y'urugamba rwo kubohora u Rwanda.
Ati 'Tuzagera aho Afande Fred Rwigema yaguye, aho indaki ya Perezida Paul Kagame yari iri hanyuma tuzamuke tugere kuri Muhazi ari naho tuzarara...'
Akomeza ati 'Uko twabiteguye ni uko tuzapimisha abantu bose, bose bazaba bafite impapuro bipimishije Covid-19. Ikindi tuzaba dufite imodoka nini, kandi guhana intera bizubahirizwa.'
Muyoboke yavuze ko muri iki gikorwa bakoranye n'Inzu Ndangamateka y'Urugamba rwo kubohora u Rwanda ari nayo izabaha uzagenda abasobanurira amateka ari we Medard wabaye ku rugamba rwo kubohora u Rwanda, Ikigo cy'Igihugu cy'Iterambere, RDB n'abandi.
Urugendo shuri ruzatangira Kagitumba rukomereza kuri Muhazi. Abantu bagera kuri 20 bamaze kwiyandisha, ndetse buri wese asabwa kuzaserukana imyambaro ifite ibara rya Gisirikare muri uru rugendo shuri rugamije gufasha benshi kumenya ubuzima bw'urugamba rwo kubohora u Rwanda rwayobowe na Perezida Paul Kagame.
Bamwe mu byamamare bamaze kwemeza kuzitabira urugendo shuri ahabereye 'Phase 1' y'urugamba rwo Kwibohora
Muyoboke Alex uri mu bari guteguye uru rugendo, aha ari kumwe na DJ Diallo uzasusurutsa abazitabira uru rugendo rw'iminsi ibiri
Mu gihe cy'iminsi ibiri, abazitabira uru rugendo shuri bazasobanurirwa birambuye uko urugamba rwo kubohora u Rwanda rwagenze