Aba bagabo bahoze badacana uwaka, bahuye bagirana ibiganiro nyuma y'imyaka 10 ubwo muri kiriya gihugu hadukaga intambara yatewe no kuba Laurent Gbagbo yari yaze kwemera ibyavuye mu matora y'umukuru w'Igihugu.
Gbagbo wari umaze igihe ari mu buhungiro, yagarutse mu gihugu mu kwezi gushize, nyuma yuko urukiko mpuzamahanga mpanabyaha (ICC/CPI) rwemeje ko ari umwere ku byaha byibasiye inyokomuntu yaregwaga.
Aba bagabo bombi bari guharanira ko habaho amahoro n'ubwiyunge.
Kuri uyu wa kabiri, mu murwa mukuru Abidjan, Ouattara, w'imyaka 79, yahaye ikaze mu biro bye Gbagbo w'imyaka 76.
Perezida Ouattara yabwiye Gbagbo ati "Ndishimye kukubona."
Amashusho yo muri iyo nama bagiranye, abagaragaza bombi bamwenyura ndetse banafatanye ikiganza, mu gihe bimezaga neza ngo bafotorwe.
Avugira mu kiganiro n'abanyamakuru nyuma y'inama yabo, Ouattara yavuze ko akaduruvayo bagashyize inyuma yabo.
Yongeyeho ati "Icy'ingenzi kuri Côte d'Ivoire ni amahoro mu gihugu cyacu."
Gbagbo yasabye ko imfungwa zafunzwe kuva intambara yaba zirekurwa.
Bamwe babona uku guhura kwabo nk'ikimenyetso cyo gukira ibikomere kw'iki gihugu, ariko Justin Katinan Koné, umuvugizi wa Gbagbo, yasabye abantu "kutaremereza cyane" guhura kwabo.
Gbagbo yafatiwe mu ngoro ya perezida mu kwezi kwa kane mu 2011 yoherezwa ku rukiko rwa ICC i La Haye (The Hague) mu Buholandi.
Nyuma yo kugirwa umwere, yabaye mu murwa mukuru Buruseli w'Ububiligi, mbere yuko atumirwa na Ouattara ngo agaruke mu gihugu.
Yagarutse mu gihugu mu kwezi kwa gatandatu yakirwa n'abamushyigikiye.
Aracyafite igifungo cy'imyaka 20 yakatiwe nyuma yuko ahamijwe adahari ubusahuzi bwa banki yo mu karere mu gihe cy'intambara.
