Aba bahanzi bazahurira mu gitaramo cyateguwe na East Africa Promoters (EAP) kizaba tariki 4 Nyakanga 2021, kizabera kuri Televiziyo y'u Rwanda guhera saa yine n'iminota 30' z'ijoro. Iki gitaramo cyatewe inkunga na Laboratwari y'u Rwanda y'Ibimenyetso bya Gihanga byifashishwa mu butabera (Rwanda Forensic Laboratory, RFL).
Umunsi wo Kwibohora 27 uzizihizwa mu buryo budasanzwe bitewe n'icyorezo cya Coronavirus cyugarije Isi muri iki gihe. Mu bihe bisanzwe, ku munsi nk'uyu ukomeye ku Rwanda byabaga ari ibirori byaberaga mu Midugudu no kuri Stade.
Ubu uyu munsi uzizihizwa abantu bari mu ngo mu rwego rwo kubahiriza amabwiriza yashyizweho agamije guhangana n'icyorezo cya Coronavirus.
Ingamba nshya zo kwirinda Covid-19 zatangiye kubahirizwa tariki 1 Nyakanga 2021, harimo ko ingendo zibujijwe guhera saa kumi n'ebyiri za nimugoroba (6:00 PM), kugeza saa kumi za mu gitondo (4:00 AM).
East Africa Promoters (EAP) yateguye igitaramo yahurijemo Army Jazz Band, Masamba Intore na Mariya Yohana, yavuze ko yagiteguye mu rwego rwo gufasha Abanyarwanda kwizihiza umunsi wo kwibohora ku nshuro ya 27.
Bakomeza bati 'EAP ibararikiye gukurikirana igitaramo cya Iwacu Muzika Festival 2021 kizaba kuri taliki ya 4 Nyakanga kuri Television y'u Rwanda saa ine n'igice z'ijoro. EAP iboneyeho kandi no kubifuriza umunsi mwiza w'ubwigenge.'
Masamba Intore uzaririmba muri iki gitaramo azwi mu ndirimbo nka 'Rwanda Itagendwa', 'Inkotanyi Cyane', 'Kanjogera', 'Ab'iwacu muraho' n'izindi.
Mariya Yohana ni umwe mu bahanzi nyarwanda b'indirimbo gakondo ufite ijwi ry'umwimerere. Yakoze ibikorwa by'indashyikirwa byagiriye igihugu akamaro harimo gusigasira umuco binyuze mu buhanzi n'ubuvanganzo, kurerera igihugu biciye mu bigo by'amashuri yanyuzemo yigisha akaba ari n'umwe mu batanze umusanzu mu kubohoza igihugu aho yaje no kumenyekana cyane mu indirimbo 'Intsinzi' yakunzwe cyane.
RDF Military Band baseruka mu mwambaro uranga Ingabo z'u Rwanda baririmba indirimbo zirata ibigwi by'Intwari z'u Rwanda zirimo nka 'Iya mbere ukwakira', 'Ngabo z'u Rwanda', 'Komeza Ubutwari', 'Duteze imbere u Rwanda' n'izindi.
Yaherukaga guhurira mu gitaramo n'Itorero ry'Igihugu Urukerereza, Alyn Sano, Peace Jolis na Ruhumuriza James [King James] gisingiza Intwari z'Igihugu.
Ibitaramo by'iserukiramuco rya Iwacu Muzika Festival byatangijwe mu Cyumweru gishize bifunguwe n'umuhanzi Platini wakoreye igitaramo gikomeye kuri Televiziyo y'u Rwanda.
RDF Military Band izaririmba mu gitaramo cyo Kwibohora
Igitaramo cyo kwizihiza kwibohora kizabera kuri Televiziyo y'u Rwanda cyatewe inkunga na Laboratwari y'u Rwanda y'Ibimenyetso bya Gihanga byifashishwa mu butabera (Rwanda Forensic Laboratory)
