Umugabo wo mu Murenge wa Rusororo mu Karere ka Gasabo mu Mujyi wa Kigali, arakekwaho gutegera umugore we mu nzira akamwica amuteye icyuma imbere y'abana babo bareba.
Ubu bugizi bwa nabi bwabaye ku wa Kane tariki ya 8 Nyakanga 2021, ubwo uriya mugabo yateye umugore we icyuma ahita apfa .
Umunyamabanga Nshingwabikorwa w'Umurenge wa Rusororo, Nsabimana Matabishi Désiré avuga ko ubu bwicanyi bwatewe n'amakimbirane yo mu ngo, anashimangira ko uwo mugabo yishe umugore we abana babo bareba.
Yakomeje avuga ko nyuma yo kwica umugore we, uyu mugabo yahise acika ndetse ko inzego zitandukanye zirimo iz'umutekano zatangiye igikorwa cyo kumushakisha.
Yasabye abantu kujya batangira amakuru ku gihe bamenyesha ubuyobozi ibibazo bafitenye aho kwicana.
Umurambo wa nyakwigendera wahise ujyanwa ku Bitaro bya Polisi ku Kacyiru mu gihe abana be bo bari mu nshuti z'umuryango wabo.
Inzego zirimo urw'Igihugu rw'Ubugenzacyaha RIB zahise zitangira akazi kazo aho hahise hatangira gukorwa iperereza.
