Umunyamabanga wa Leta muri Minisiteri y'Urubyiruko n'Umuco ushinzwe Umuco, Hon. Bamporiki Edouard yashimye uburyo umunyezamu Mvuyekure Emerry yitwaye ku mukino u Rwanda rwatsinzwemo na Mali igitego 1-0.
Mu butumwa yanyujije kuri Twitter, Bamporiki yagize ati 'Umukurambere ati : Izina niryo muntu ! Mvuyekure atuvanye aho umwami yakuye Busyete. Mwakoze Amavubi. Ishyaka mwagaragaje ririmo gutarama u Rwanda, ejo haje muzarwimana. Kwiga ni ukwigana dukomeze Gukotana bizatugeza ku Umutsindo.'
Kuri uyu wa Gatatu tariki ya 01 Nzeri 2021, nibwo Ikipe y'u Rwanda 'Amavubi' yatsinzwe umukino wa mbere wo mu itsinda F mu majonjora yo gushaka itike yo kwerekeza mu mikino y'igikombe cy'isi 2021 na Mali igitego 1-0. Igitego cya Adama Traore ku munota wa 19 w'umukino nicyo cyahesheje intsinzi Mali imbere y'u Rwanda mu mukino wabereye kuri Adrar Stadium mu gihugu cya Maroc.
U Rwanda rwatangiye uyu mukino rurushwa cyane,byatumye ku munota wa 18 Mali ibona penaliti nyuma y'ikosa Yannick Mukunzi yakoreye Moussa Djenepo, wayitereye ariko Emery Mvuyekure ayikuramo.
Nyuma y'umunota umwe gusa,ubwugarizi bw'Amavubi bwakoze ikosa rikomeye ryatumye Adama Traore atsindira Mali igitego cya mbere ari nacyo cyabonetse muri uyu mukino, Amavubi yagerageje gushaka uko yishyura iki gitego ariko biranga umukino urangira ari 1-0 gusa igice cya kabiri yari yagerageje kwinjira mu mukino ugereranyije n'igice cya mbere.
Amavubi azakina na Kenya ku Cyumweru nyuma y'uko iyi kipe izagukina na Uganda kuri uyu wa Kane tariki ya 02 Nzeri 2021.
Amavubi yatsinzwe na Mali igitego 1_0
