Aba bantu uko ari icyenda barimo uw'igitsinagore umwe, bagombaga kuburana ku ifunga n'ifungurwa ry'agateganyo mu rubanza rw'Ibanze rwa Kicukiro.
Ni iburanisha ryagaragayemo Ingabire Victoire Umuhoza washinze ishyaka DALFA-Umurinzi ritaremerwa mu Rwanda.
Aba bantu bamaze ibyumweru bibiri n'igice batawe muri yombi, barimo kandi Nsengimana Théoneste usanzwe ari Umunyamakuru wa YouTube Channel yitwa Umubavu TV akaba ari na we wawushinze.
Aba baregwa ibyaha birimo gutangaza amakuru y'ibihuha, bose bagombaga kunganirwa n'Umunyametegeko Me Gatera Gashabana usanzwe azwi mu manza zikomeye mu Rwanda ari na we wunganiye Ingabire Victoire ubwo yaburana ku byaha yahamijwe akaza kurekurwa ku bw'imbabazi za Perezida wa Repubulika.
Ubwo abaregwa n'Ubushinjacyaha ndetse n'inteko y'urukiko bageraga mu cyumba cy'urukiko, Me Gashabana yatane inzitizi avuga ko abo yunganiye batiteguye kuburana kuko babonye dosiye batinze mu gitondo cya none bageze mu rukiko.
Ni na byo byashimangiwe n'abaregwa babwiye Urukiko ko bakeneye guhabwa umwanya wo kubanza gusoma dosiye.
Urukiko rwahise ruha umwanya Ubushinjacyaha kugira ngo bugire icyo buvuga kuri iyi nzitizi y'uruhande rw'abaregwa, buvuga ko ibiregwa bariya bantu atari bishya kuri bo kuko yaba mu Bugenzacyaha no mu Bushinjacyaha babibajijweho
Urukiko rushingiye ku burenganzira bwo kwiregura bw'abaregwa, bwafashe umwanzuro wo gusubika urubanza, rurwimurira tariki 02 Ugushyingo 2021.
UKWEZI.RW
