Uyu mugabo yaburanishijwe n'Urukiko rw'Ibanze rwa Kiyumba ku wa Gatatu tariki 27 Ukwakira 2021 aho uregwa yabanje kugaragaza inzitizi z'uko afunzwe binyuranije n'amategeko.
Mu mizi, Ubushinjacyaja bwavuze ko ko ku wa 03/05/2021 ngo umwana yari akurikiye abandi bana bagiye kuvoma uyu mugabo ukekwaho kumusambanya ngo nibwo yamufashe amujyana ahantu mu bishyimbo atangira kumusambanya ngo aza kubonwa n'abana uriya yari akurikiye kuvoma.
Umugabo ukekwa ngo abonye ko abantu bamubonye, ndetse ko abaturanyi babimenye ngo yahise yiruka bamwirukaho arabasiga, ariko nyuma aza gufatwa hatanzwe inyandiko zo kumufata.
Uregwa avuga ko bitashoboka ko yari gusambanya umwana hari n'abandi bantu, akavuga ko uwo mwana yari kumwe n'abandi kandi ngo harimo n'abakuru bafite imyaka 16 na 18, akemeza ko atari kwirukanka ngo asige abantu bose batuye Umudugudu.
Yavuze ko aho bavuga ko yari yarahunze, atari byo kuko ngo yari yaragiye i Kigali gupagasa.
Ubushinjacyaha bwabwiye Urukiko ko raporo Muganga, yagaragaje ko akarangabusugi k'umwana kafungutse.
Uregwa yunganiwe na Me Hakizimana Albert, bahise babwira Urukiko ko iyo Raporo ya Muganga ivuga ko 'nta kimenyetso ko umwana yasambanyijwe.'
Urubanza rurasomwa kuri uyu wa Gatanu tariki 29 Ukwakira 2021.
