Mbere y'uko shampiyona ya 2021-22 itangira, hatoranyijwe ikipe y'abakinnyi 11 beza b'ibigango bazatanga akazi gakomeye, ni urutonde ruriho umutoza wa APR FC, Adil Erradi, rutahizamu wa Kiyovu Kiyovu Sports, Emmanuel Okwi, umunyezamu Kkwizera Olivier n'abandi.
Ibigango mu buzima busanzwe benshi babifata nk'igitinyiro, ubifite aba yubashywe na benshi ntapfa gusuzugurwa, muri ruhago umukinnyi w'igihagararo benshi baramutinya kuko atanga akazi ku bo bahanganye.
Iyo urebye muri shampiyona y'icyiciro cya mbere mu Rwanda, izaba irimo abakinnyi barenga 350, usanga nta bakinnyi b'ibigango benshi barimo, ari naho havuye igitekerezo cyo kuba hakorwa iyi kipe y'Amajigo (Ibigango) kandi bafasha amakipe bakinira.
Iyi kipe y'abakinnyi b'ibigango kandi beza bakina muri shampiyona y'icyiciro cya mbere mu Rwanda yiswe 'Amajigo', yatoranyijwe n'itsinda ry'abanyamakuru ba siporo ari nabo bagize icyo gitekerezo cyo kuyikora.
Bimwe mu bushingirwaho harimo kuba umukinnyi afite ibigango ku buryo n'uwo bagiye guhura yamutinya bitewe n'ingano ye, kuba azabona umwanya wo gukina mu ikipe ye, kuba afite ishyaka ryinshi akanashyira igitutu kubo bahanganye n'ibindi.
Ni ikipe yazajya ikina hakoreshejwe uburyo bwa 4-1-3-2.
Rutahizamu wa Kiyovu Sports, Emmanuel Okwi akaba na kapiteni w'ikipe y'igihugu ya Uganda, ni we wagiriwe icyizere cyo kuba yaba kapiteni w'iyi kipe.
Umutoza wa APR FC, nk'umwe mu batoza b'ibigango bari muri shampiyona, umaze kwigaragaza ni we wagiriwe icyizere cyo kuba yatoza iyi kipe.
Dore 11 bagize iyi kipe
Umunyezamu: Kwizera Olivier (Rayon Sports)
Ba myugariro: Mbogo Ally(Gasogi United), Habimana Hussein (Rayon Sports), Lamine Moro (AS Kigali) na Rugwiro Herve(AS Kigali)
Abakina hagati: Nsengiyumva Isaac (Rayon Sports), Bizimana Amissi Coutinho (Kiyovu Sports), Drissa Dagno (Rutsiro FC) na Emmnanuel Okwi (Kiyovu Sports)
Ba rutahizamu: Saba Robert (AS Kigali) na Sugira Ernest (AS Kigali)
