Byatangajwe n'Ubushinjyaha Bukuru bw'u Rwanda kuri uyu wa Gatatu tariki 20 Ukwakira 2021 mu itangazo bwasohoye.
Itangazo ryanyujijwe kuri Twitter y'Ubushinjacyaha Bukuru bw'u Rwanda, rigira riti 'Ubushinjacyaha Bukuru bwamaze gutanga ikirego cy'ubujurire ku cyemezo cy'Urukiko Rukuru cyo ku ya 20 Nzeri 2021 mu rubanza rurengwamo Nsabimana Callixte alias Sankara n'abo baregwa hamwe.'
Urugereko rw'Urukiko Rukuru ruburanisha ibyaha Mpuzamahanga n'ibyambukiranya imipaka rwaburanishije bariya bantu 21, rwakatiye Paul Rusesabagina igifungo cy'imyaka 25 mu gihe Ubushinjacyaha bwari bwamusabiye gufungwa burundu.
Naho Nsabimana Callixte alias Sankara we yari yakatiwe gufungwa imyaka 20 mu gihe yari yasabiwe gufungwa imyaka 25 naho mugenzi we Nsengimana Herman wari wasabiwe gufungwa imyaka 20, akatirwa imyaka itanu (5).
Abandi bo bari bakatiwe muri ubu buryo : Nizeyimana Marc (20), Bizimana Cassien (20), Matakamba Jean Berchmans (20), Shaban Emmanuel (20), Ntibiramira Innocent (20), Byukusenge Jean Claude (20), Nsabimana Jean Damascene (20), Nikuzwe Simeon (10).
Naho Nsanzubukire Felicien (5) Munyaneza Anastase (5), Hakizimana Theogene (5), Iyamuremye Emmanuel (5), Niyirora Marcel (5), Kwitonda Andre (5), Mukandutiye Angelina (5), Ntabanganyimana Joseph (3), Nshimiyimana Emmanuel (3), Ndagijimana Jean Chretien (3).
Ubwo Urukiko rwasomaga icyemezo cyarwo muri uru rubanza rw'amateka, bamwe mu bagizweho ingaruka n'ibitero byagabwe n'inyeshyamba za MRCD-FLN, bari bagaragaje kutanyurwa na biriya bihano byahawe abagize uruhare mu kubahekura.
Umwe mu bagizweho ingaruka na biriya bitero, ubwo yagarukaga kuri Rusesabagina, yavuze ko iyo igihano cy'urupfu cyari kuba kikiriho ari cyo cyari kimukwiye kuko na we yishe Abanyarwanda.
Icyo gihe yagize 'Ubu se sa Sita ntari burye ntibari bumugaburire, ubu se Fidel baramugaburira ? ubu se Diregiteri baramugaburira ? ubu se abaguye ku Kitabi azabishyura ? ubu se ko yamaze kumugaza hano ubu ntarimo arya njye nkaba nabuze na fanta yo kunywa."
Umuvugizi w'Ubushinjacyaha, Faustin Nkusi na we yari yagaragaje ko Ubushinjacyaha bwaburanye n'abaregwa na bwo butanyuzwe na biriya bihano byahanishijwe abaregwa.
Icyo gihe Faustin Nkusi yari yatangarije Ikigo cy'Igihugu cy'Itangazamakuru RBA ko bagiye gusoma inyandiko ikubiyemo kiriye cyemezo ku buryo nibiba ngombwa bazajurira.
UKWEZI.RW
