Clarisse Karasira yahuje imbaraga na Liza Kam...

Niyo ndirimbo ya mbere Clarisse Karasira asohoye kuva yajya gutura muri Leta Zunze Ubumwe za Amerika n'umugabo we Ifashabayo Dejoie Sylvain [Agaragara mu mashusho y'iyi ndirimbo]. Niyo ndirimbo kandi ya mbere, uyu muhanzikazi asohoye ihimbaza Imana kuva yakwinjira mu muziki.

Ni indirimbo ifite igisobanuro kinini kuri we, kuko yayikoranye n'umuhanzikazi Liza Kamikazi yakuze akundira inganzo, by'umwihariko ni 'marraine we'.

Asohora iyi ndirimbo kuri uyu wa Gatatu tariki 17 Ugushyingo 2021, Clarisse Karasira yavuze ko hari igihe kigera mu buzima bwa muntu, agafata umwanya agatekereza aho avuye n'aho ageze, agasanga ni inzira y'ibitangaza yanyuze yashobojwe n'Imana gusa.

Uyu mugore yavuze ko iyi ndirimbo ari ukwemera kwe ku Mana n'ububasha bwayo mu buzima bwe, akayisaba gukomeza kumugirira neza mu buzima bwe n'abandi.

Clarisse yavuze ko we na Liza Kamikazi bafite icyizere cy'uko 'Iyi ndirimbo izahesha umugisha imitima yanyu, ikabaha icyizere cyo gukunda Imana no kuyiha umwanya mu buzima bwanyu.'

Liza Kamikazi yavuze ko yifuza kwibutsa buri wese ko 'Nta handi gutabarwa kwacu kubonerwa uretse ku Mana yaremye ijuru n' isi. Nta kindi dufite rero cyo kwishingikirizaho uretse umwana wayo Yesu Kristo ari we Munara utabasha kunyeganyezwa kandi nta wamuhungiyeho ukorwa n'isoni.'

Muri iyi ndirimbo, aba bahanzi bahuriza ku kuvuga ubushozi bw'Imana mu buzima bwa buri munsi bwa muntu. Kandi, ko nta jambo yavuze ngo rihere.

Bavuga ko mu bihe bitandukanye babonye Imana ikora; igakiza abarwayi, igatanga urubyaro ku bari bihebye, amahoro yo mu mutima n'ibindi.

Clarisse Karasira aherutse kubwira INYARWANDA, ko yahisemo gukorana na Liza Kamikazi kubera ko ari umuhanzi w'umuhanga akunda kuva na cyera, kandi ko yakuze yifuza gukorana indirimbo nawe.

Avuga ko bwa mbere ahura na Liza Kamikazi byaturutse ku kiganiro yamwumvisemo kuri Radio, agahita afata moto akamusanga kuri iyo Radio. Avuga ko icyo gihe baganiriye, ariko ko atigeze amubwira ko yifuza ko bakorana indirimbo kuko yabonaga ko bitashoboka.

Ati 'Ndabyibuka bwa mbere duhura namwumvise ahantu kuri Radio mpita ntega njya kumureba, mubwira ko mukunda ariko sinamubwira ko nifuza ko twakorana indirimbo kuko numvaga bitashoboka mbese atabyemera.'

Uyu muhanzikazi avuga ko nyuma yaje kumenyana na Liza Kamikazi amubera umuvandimwe, kugeza ubwo amuhisemo nka 'Marraine' we mu bukwe bwe.

Akomeza ati 'Nyuma rero yaje kumbera nk'umubyeyi ndetse ninshuti y'umuryango cyane, nagiye mwigiraho byinshi turahuza kugeza ubwo inzozi zo kuririmbana nawe zabaye impamo.'

Amajwi y'iyi ndirimbo yatunganyijwe na Clement the Guitarist naho amashusho akorwa na Bless World Music banamukoreye indirimbo iheruka yise 'Nimukongeze'.