Iyi nama yabereye muri Village Urugwiro yari igamije gusuzuma no kwemeza ingamba zijyanye no gukumira ubwoko bushya bwa Covid-19 bwahawe izina rya Omicron, bwemejwe ko buteye impungenge n'Ishami ry'Umuryango w'Abibumbye ryita ku Buzima (WHO). N'ubwo butaragaragara mu Rwanda, ingaruka zabwo zishobora kuba mbi cyane; bityo abanyarwanda n'abaturarwanda barasabwa gukaza no kubahiriza ingamba zo kwirinda.
Mu ngamba zashimangiwe n'Inama y'Abaminisitiri mu kurushaho kwirinda ubu bwandu bushya, harimo ingingo ivuga ko "Abantu bitabira ibirori/amakoraniro rusange harimo inama, ibitaramo by'abahanzi, ubukwe, Fesitivali cyangwa imurikabikorwa bagomba kuba barikingije kandi baripimishije Covid-19. Abategura amakoraniro bagomba gukora ku buryo abera hanze cyangwa ahantu hagera umwuka uhagije".
Ikindi ni uko ingendo hagati y'u Rwanda n'ibihugu byo mu Majyepfo ya Afurika zasubitswe. Abagenzi bose binjira n'abasohoka mu gihugu bakoresheje ikibuga mpuzamahanga cya Kigali bagomba kuba bafite icyemezo cy'uko bipimishije Covid-19 (PCR Test) mu gihe cy'amasaha 72 mbere y'uko bahaguruka.
Abagenzi bose binjira mu gihugu bagomba guhita bashyirwa mu kato k'amasaha 24 muri Hoteli zabugenewe kandi bakiyishyurira ikiguzi cya serivisi bahabwa. Abagenzi bose bapimwa Covid-19 (PCR test) bakigera mu gihugu biyishyuriye bakongera gupimwa ku munsi wa 7 bishyuriwe na Guverinoma y'u Rwanda ahantu hagenewe gupimirwa Covid-19.
Abagenzi baturutse mu bihugu byagaragayemo ubu bwoko bushya bwa Covid-19 cyangwa baherutse gukorera ingendo muri ibyo bihugu, bahita bashyirwa mu kato k'iminsi 7, bakiyishyurira ikiguzi cya serivisi bahabwa. Urutonde rw'ibyo bihugu ruzatangazwa na Minisiteri y'Ubuzima nyuma y'isesengura rizakomeza gukorwa ku myitwarire y'ubu bwoko bushya bwa Covid-19 ku bufatanye n'inzego mpuzamahanga zibishinzwe.
Abanyarwanda barashishikarizwa kwikingiza byuzuye, kwipimisha no kurushaho gushyira mu bikorwa amabwiriza yo kwirinda Covid-19, harimo; gusiga intera hagati y'umuntu n'undi, kwambara neza agapfukamunwa, gukingura inzugi n'amadirishya kugira ngo umwukaugahije winjire no gukaraba intoki.
'Omicron', ubwoko bushya bwa Covid-19 bwabonetse bwa mbere muri Afrika y'Epfo (S.A) mu minsi micye ishize, magingo aya bumaze kugera mu bihugu bitandukanye muri Afrika ndetse bwanageze mu Bushinwa n'i Burayi. Leta Zunze Ubumwe za Amerika n'Ubumwe bw'Uburayi baherutse gukumira abaturage bo muri Afrika y'Epfo n'abo mu bihugu 7 byegeranye nayo ku bijyanye no kuba bahakorera ingendo. WHO/OMS iherutse gutangaza ko ubu bwoko bushya bukwirakwira cyane kurusha ubundi bwose bwa Covid-19
Itangazo ry'Ibyemezo by'Inama y'Abaminisitiri Idasanzwe yo ku wa 28 Ugushyingo 2021
