Mu gihugu cya Autriche , hari kuvugwa inkuru y' uko guverinoma y' icyo gihugu yashyizeho guma mu rugo ku bantu bose bari hejuru y'imyaka 12 batakingiwe Covid19 mu rwego rwo kugabanya ubwiyongere bw'iki cyorezo muri iki gihugu.
Igihugu cya Autriche kimaze gukingira 65% by'abaturage bose, akaba ari nacyo gifite umubare muto w'abahawe urukingo mu Burayi hose.
Amakuru avuga ko Chancelier wa Autriche, Alexander Schallenberg, yatangaje ko guhera ku wa Mbere tariki 15 Ugushyingo 2021, abantu bose batakingiwe batemerewe kuva mu rugo uretse gusa abafite impamvu zihariye, aho Polisi izajya igenda igenzura ko abasohotse mu nzu bafashe uru rukingo.
Iki cyemezo kirakora ku bantu hafi miliyoni ebyiri muri miliyoni 8.9 zituye iki gihugu kuko ari bo banze kwikingiza.
Hatangajwe ko abazajya basohoka bagiye gufata urukingo bo bazajya bemererwa kugenda.
Kugeza ubu iki gihugu kiri kwibasirwa n'ubwiyongere bwa Coronavirus, aho CNN itangaza ko 30% by'ibitanda by'indembe byuzuyeho abarwaye iki cyorezo.
Mu minsi irindwi ishize iki gihugu cyagize ubwandu bushya bungana na 11.552, mu gihe icyumweru cyari cyabanje bari babonye ubwandu 8.554.
Uyu mwanzuro wa Autriche uje mu gihe Covid-19 ikomeje kototera ibihugu byo mu Burayi bwo hagati, aho u Budage, u Buholandi na Norvège biri gushyiraho amabwiriza akarishye ku banze gukingirwa arimo kubabuza kujya mu tubyiniro, mu tubari, mu bitaramo, restaurants, siporo n'ibindi byose hagamijwe kugabanya ubwiyongere bw'ubwandu.
Ishami ry'Umuryango w'Abibumbye ryita ku Buzima, OMS, rigaragaza ko mu byumweru bibiri bikurikirana bishize, umugabane w'u Burayi ari wo wonyine ku Isi wagize imibare izamuka cyane haba ku bandura n'abahitanwa na Covid-19.
Muri raporo ya OMS ya buri cyumweru igaragaza ko hagati yo ku itariki ya 1 na 7 Ugushyingo hagaragaye ubwiyongere bwa 1% bw'ubwandu bwa Coronavirus kuri uyu mugabane, aho habonetse ubwandu bushya ku barenga miliyoni 3.1, mu gihe abahitanwe nayo mu minsi irindwi ishize biyongereyeho 10%.
