Kuri iki Cyumweru tariki 28 Ukuboza 2021, ni bwo Mr Kagame yasohoye iyi ndirimbo ye yakoreshejemo umukobwa wo mu Karere ka Musanze.
Ni indirimbo avuga ko ashaka ko izamenyekana mu karere ka Afurika y'Iburasirazuba nk'uko indirimbo 'weekend' ya Eddy Kenzo ihagaze muri iki gihe.
Avuga ko 'Sembela' ari ijambo ryo mu kigande risobanuye kwegera. Ati 'Ni indirimbo nshaka ko ifata Afurika y'Iburasirazuba nk'uko iyi 'weekend' [Ya Eddy Kenzo] yabigenje.'
Mr Kagame yabwiye INYARWANDA, ko yasohoye iyi ndirimbo mu rwego rwo kuticisha irungu abafana be n'abakunzi b'umuziki kuko ari gukora kuri EP azasohora tariki 26 Ukuboza 2021.
Ni Ep avuga ko iriho indirimbo esheshatu kandi ko zose ari nshya. Avuga ko muri izi ndirimbo harimo ebyiri yakoranye n'abahanzi Nyarwanda ndetse n'indi imwe yakoranye n'umuhanzi wo mu mahanga atahise atangaza.
Kagame avuga ko iyi EP ye iriho indirimbo z'urukundo n'izindi zivuga ku buzima busanzwe, kandi ko yakozweho na ba Producer barimo X on the beat, MadeBeats, Santana na Herbert Skillz.
Uyu muhanzi avuga ko ubu atahita atangaza amazina y'iyi EP. Yaherukaga gusohora indirimbo 'Bella' ikunzwe muri iki gihe cyane cyane mu tubyiniro no mu bitangazamakuru.
Mu buryo bw'amajwi (Audio) iyi ndirimbo 'Sembela' yakozwe na Producer Santana muri Hi5, inononsorwa na Herbet Skillz naho amashusho yakozwe na  B8films.
Mr Kagame yemeza ko umuziki we nta mupaka ugira ku buryo injyana iyo ari yo yose yaririmbamo igihe cyose inganzo yamufatira, kandi ko yandika indirimbo ahanini agendeye ku biganiro agirana n'abantu batandukanye bikamuha guhuza ibitekerezo.
Mr Kagame yasohoye amashusho y'indirimbo ye nshya yise 'Sembela'
Mr Kagame yavuze ko ari gutegura Ep ye nshya iriho indirimbo yakoranye n'umuhanzi wo mu mahanga
KANDA HANO UREBE AMASHUSHO Y'INDIRIMBO 'SEMBELA' YA MR KAGAME
Source : https://inyarwanda.com/inkuru/111995/mr-kagame-yasohoye-indirimbo-nshya-ararika-ep-video-111995.html
