Ibitego bya Nishimwe Blaise, Steve na Onana Willy Essombe byafashije Rayon Sports kwegukana amanota 3 nyuma yo gutsinda 3-1 Bugesera FC.
Rayon Sports yari yakiriye Bugesera FC mu mukino w'umunsi wa 3 wa shampiyoma y'icyiciro cya mbere umwaka w'imikino 2021-22.
Rayon Sports ikaba yaherukaga kunganya na Rutsiro 2-2 mu mukino w'umunsi wa 2, ikaba itagombaga gukora ikosa imbere ya Bugesera FC yari yatsinze Etincelles.
Igice cya mbere cyihariwe na Rayon Sports yabonye amahirwe menshi ariko bakabanza kugorwa n'umunyezamu Chaolin n'ubwo na we yasaga nk'utari mu mukino.
Ku munota wa 35 Rayon Sports yafunguye amazamu ku gitego cyatsinzwe na Nishimwe Blaise n'umutwe ku mupira wari uhinduwe na Nizigiyamana Karim Mackenzie.
Iyi kipe yaje no gutsinda igitego cya 2 ku munota wa 43 gitsinzwe na Onana Willy Essombe. Amakipe yagiye kuruhuka ari 2-0.
Bugesera FC yatangiye igice cya kabiri ikora impinduka, umunyezamu Chaolin wabonaga atari mu mukino avamo hajyamo Amani.
Ku munota wa 50, Rayon Sports nayo yakoze impinduka havamo Niyigena Clement wagize ikibazo cy'imvune hajyamo Mugisha Francois Master. Ku munota wa 68, Youssef yahaye umwanya Sadjati.
Ku munota wa 73, Rayon Sports yatsinze igitego cya 3 gitsinzwe na Steve Elumanga nyuma y'uko umunyezamu Amani yananiwe gufata ngo awugumane.
Bugesera FC yaje kubona igitego cya mbere ku munota wa 75 kuri kufura yari itewe na Rafael, ni nyuma y'uko Blaise yari akoze umupira. Umukino waringiye ari 3-1.
Uko imikino yose y'umunsi wa 3 yagenze
Ku wa Kane tariki ya 18 Ugushyingo
Gorilla FC 0-1 AS Kigali
Espoir FC 0-0 Gicumbi FC
Ku wa Gatanu tariki ya 19 Ugushyingo
Marines FC vs Mukura VS&L (wasubitswe)
Gasogi United 3-2 Rutsiro FC
Kiyovu SC 1-1 Police FC
Ku wa Gatandatu tariki ya 20 Ugushyingo
Rayon Sports FC 3-1 Bugesera FC
Etincelles FC vs APR FC (wasubitswe)
Etoile de l'Est 2-3 Musanze FC
AMAFOTO: Ububiko
Source : http://isimbi.rw/siporo/article/rayon-sports-yatsinze-bugesera-fc
