Ni amasezerano y'umwaka izi sosiyete zombi zagiranye aho umuntu azajya agura telefoni iyo ariyo yose ya Infinix Mobile, agahabwa internet y'ubuntu ya Mango 4G.
Hamurikwa ubu bufatanye Junior Giti umaze kwamamara mu gusobanura filime ndetse n'umuraperi Ish Kevin nibo bagiye kwifashishwa mu kumenyekanisha ubu bufatanye bifashishije imbuga nkoranyambaga.
Mu kiganiro n'itangazamakuru, Cynthia Uwase, ushinzwe imishinga muri Mango 4G, yavuze ko ashimishijwe n'uko uyu mushinga watangiye cyane ko wanashyizweho kugira ngo ufashe abantu muri iyi minsi mikuru.
Ati 'Nshimishijwe n'umushinga watangiye. Muri iki gihe turimo twashyizeho poromosiyo aho umuntu agura telefoni iyo ari yo yose ya Infinix agahabwa internet y'ukwezi ya Mango 4G. ibi bikunda kuri telefoni yose iguzwe ariko ijyamo internet ya 4G.'
Rugomboka Yvan wari uhagarariye Infinix muri iki gikorwa yatangaje ko ubu bufatanye buzamara igihe cy'umwaka kandi babwitezeho buzabyara umusaruro. Yashimiye Ish Kevin kuko mu gihe bamaze bakorana hari umusaruro byatanze.
Ati 'Mu 2017 nibwo Infinix yageze mu Rwanda yari imaze imyaka itatu itangiye gukorera mu bindi bihugu bitandukanye ariko twishimira ibyo tumaze kugeraho. Buriya telefoni nziza ijyana na internet nziza niyo twatekereje gukorana na Mango 4G. Ish Kevin ni umwaka wa kabiri turi gukorana.'
Yongeyeho ati 'Telefoni za Infinix zakorewe urubyuruko ni nayo mpamvu twashatse gukorana nawe. Ikindi ahagaze neza. Ni umuhanzi buri wese ashobora kureberaho, ikindi mu gihe tumaranye ibikorwa twakoranye byabyaye umusaruro.'
Eric Niyomugabo, uyobora Mango 4G yavuze ko batekereje gukorana na Infinix bashaka gufasha Abanyarwanda kubona internet yihuta.
Ati 'Twabitekereje dushaka gufasha Abanyarwanda kubona internet yihuta. Twashatse kugira ngo abakiliya ba Infinix bajye babona internet yihuta. Dufitanye ibikorwa byinshi birenze ibi ariko ibi nibyo twatangiriyeho.'
Junior Giti na Ish Kevin bose bashimye ibikorwa izi sosiyete zimaze kugeraho, ndetse banishimira iyi gahunda nshya.
