Umuvugizi wa Polisi mu Ntara y'Iburengerazuba, Chief Inspector of Police (CIP) Bonaventure Twizere Karekezi, yavuze ko abaturage bari bamaze iminsi batanze amakuru ku bayobozi ba koperative y'abamotari bavuga ko hari moto babonye ikoreshwa mu bikorwa byo kubibira amatungo (ihene) zikajya kubagwa ari na yo yaje gufatwa.
CIP Karekezi yavuze ko bamaze gutanga ayo makuru abashinzwe umutekano mu makoperative y'abamotari muri Kamembe bafashe ya moto bayishyikiriza Polisi ariko uwari uyiriho aracika.
Yaje guca inyuma ajya kuri Polisi ahafungiye iyo Mota abwira umupolisi ko amuha amafaranga y'u Rwanda ibihumbi bitanu akamurekurira moto. Umupolisi yaramwemereye ariko abimenyesha bagenzi be abamenyesha aho aza guhurira n'uwo muntu amuha iyo ruswa kugira ngo bamufate.
CIP Karekezi yakomeje avuga ko abapolisi bafatiye mu cyuho uwo mugabo arimo gutanga iyo ruswa.
Yaboneyeho kongera gukangurira abantu gucika ku ngeso mbi yo gushaka gutanga ruswa kugira ngo bahabwe ibyo batemererwa n'amategeko byongeye bakabikora ku bapolisi kandi aribo bashinzwe kurwanya ruswa.
Ati' Uriya muntu yagombaga gukurikirana moto ye mu bundi buryo bwemewe n'amategeko atagombye gutanga ruswa, abantu duhora tubakangurira kwirinda ingeso yo kumva ko bazatanga ruswa kugira ngo bahabwe serivisi batemererwa n'amategeko. Byongeye hari abafatwa baha ruswa abapolisi birengagije ko Polisi ari urwego rushinzwe kurwanya ruswa aho iva ikagera.'
Uwo mugabo wafashwe yahise ashyikirizwa Urwego rushinzwe ubugenzacyaha(RIB) rukorera muri sitasiyo ya Polisi ya Kamembe aho yamaze gukorerwa dosiye ishyikirizwa ubushinjacyaha.
Itegeko no 54/2018 ryo kuwa 13/08/2018 rirwanya ruswa ingingo yaryo ya 4 ivuga ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose. Iyo abihamijwe n'urukiko, ahanishwa igifungo kirenze imyaka itanu (5) ariko kitarenze imyaka. irindwi (7) n'ihazabu y'amafaranga y'u Rwanda yikubye inshuro kuva kuri eshatu (3) kugeza kuri eshanu (5) z'agaciro k'indonke yatse cyangwa yakiriye.
