Utu dupfukamunwa twatanzwe kuri uyu 23 Ukuboza 2021 mu muhango wari witabiriwe n'Umuyobozi Mukuru wa Skol, Ivan Wulffaert, ndetse n'Umuyobozi Mukuru w'Ishami ry'Ubuzima n'Ubuvuzi Rusange muri Minisante, Dr Ntihabose Corneille.
Umuyobozi wa Skol, Ivan Wulffaert, yavuze ko uru ruganda rufatana uburemere ingamba zo kurwanya Covid-19, bityo ko ariyo mpamvu bifuje gutanga umusanzu mu gufatanya n'u Rwanda kurinda ikwirakwira ryayo.
Yagize ati 'Muri Skol dukoresha udupfukamunwa turenga 3000 ku munsi, aho tuduha abakozi bacu iyo binjiye mu ruganda n'igihe basohotse batashye. Rero twifuze ko twatanga n'umusanzu muri Minisiteri y'Ubuzima.'
'Navuganye na Dr. Corneille ambwira ko hari ibitaro 55 n'andi mavuriro ya leta bikoresha udupfukamunwa twinshi, niyo mpamvu twatekereje ko twabaha udupfukamunwa ibihumbi 200 two kurinda abatanga serivisi z'ubuzima muri ayo mavuriro kugira ngo turinde ubuzima bw'abo ariko tunarinda ko icyorezo gikomeza gukwirakwira.'
Dr. Ntihabose yavuze ko bishimiye umusanzu bahawe na Skol mu kurwanya ikwirakwira ry'icyorezo, avuga ko utu dupfukamunwa tuzakoreshwa n'abaganga bita ku barwayi ba Covid-19, kuko dufite ubwirinzi bwo ku rwego rwo hejuru.
Yagize ati 'Turashimira Skol kuba yatekereje kudufasha muri uru rugamba dufite rwo kurwanya Covid-19 cyane cyane no muri iki gihe dufite virus yihinduranyije. Uruhare rw'udupfukamunwa ni ingenzi kuko iyo bishyize hamwe n'izindi ngamba bituma tugabanya umubare w'abantu bandura Covid-19 tukarinda abaturage bacu.'
Utu dupfukamunwa tuzakoreshwa n'abaganga hirya no hino mu bitaro bitandukanye no mu mavuriro afasha abarwayi ba Covid-19.
Udupfukamunwa twa N-95 dufite ubushobozi bwo kurinda Coronavirus n'izindi virus zinjirira mu mazuru cyangwa mu kanwa kuruta udupfukamunwa dukunda gukoreshwa tuzwi nka 'surgical mask'.
Source : http://igihe.com/amakuru/u-rwanda/article/skol-yahaye-minisante-udupfukamunwa-turenga-ibihumbi-200
