Izi nkingo zahawe u Rwanda binyuze muri gahunda y'ubufatanye mpuzamahanga mu gusaranganya inkingo, Covax, aho zatanzwe n'Ikigo cy'Abadage kizobereye mu bijyanye no gukora imiti, BioNTech.
Ni inkingo zije gushyigikira gahunda y'u Rwanda yo gukingira abantu benshi dore ko kugeza ubu imibare igaragaza ko abagera kuri 41% bamaze gukingirwa mu buryo bwuzuye.
Ambasade y'u Budage mu Rwanda, yavuze ko Guverinoma y'iki gihugu yishimiye gufatanya n'abandi bafatanyabikorwa mu kugira uruhare muri gahunda yo kugeza inkingo ku baturage.
Gahunda ya Covax igamije kugeza inkingo za Covid-19 kuri bose, kugira ngo Isi ibashe guhashya icyo cyorezo kimaze guhitana abasaga miliyoni 3.6.
U Rwanda rwatangiye ibikorwa byo gukingira muri Werurwe uyu mwaka, ubu rumaze guha urukingo rwa mbere abaturage barenga miliyoni 7,5 mu gihe abakingiwe byuzuye barenga miliyoni 5,3.
Ku rundi ruhande, abahawe urukingo rwa gatatu ruzwi nk'urushimangira bo bamaze kurenga ibihumbi 100.
