Rutahizamu wa Gabon Perre Emerick Aubameyang na mugenzi we Mario Lemina basubijwe mu makipe yabo (Arsenal na Nice) kugira ngo bakomeze kuvurirwayo kubera ibibazo by'ubuzima bafite.
Aubameyang na Lemina banduye COVID-19 i Dubai ariko nyuma yo gukira,basanganwe ibibazo by'umutima byatumye badakoreshwa ku mukino ikipe yabo yakinnye na Ghana.
Aubameyang waje muri AFCON2021 ahunze ibihano by'umutoza we Mikel Arteta ntiyahiriwe n'ubuzima muri iki gihe kubera ibi bibazo bya COVID-19 n'ibibazo by'umutima.
Mu itangazo Ishyirahamwe ry'Umupira w'amaguru muri Gabon ryashyize hanze,ryavuze ko uyu Perre Emerick Aubameyang na mugenzi we Mario Lemina boherejwe mu makipe yabo kugira ngo bakorerwe ibizamini byisumbuyeho.
Uyu mukinnyi utamerewe neza muri Arsenal,yakuwe mu ikipe ya Gabon yagombaga guhura na Ghana mu ijoro ryo kuwa gatanu mu gikombe cya Afurika mu mukino wo mu itsinda C rya AFCON2021.
Ishyirahamwe ry'umupira w'amaguru muri Gabon ryatangaje ko Aubameyang afite "ikibazo cyumutima",cyane ko atanagaragaye mu mukino wabo wo gufungura na Comoros kubera kwandura Covid.
Itangazo ry'ishyirahamwe ry'umupira w'amaguru muri Gabon ryagize riti: "Nk'uko komisiyo ishinzwe ubuvuzi ya CAF ibivuga, abakinnyi Pierre-Emerick Aubameyang, Axel Meyé na Mario Lemina bakize Covid ariko ntibashobora kwitabira uyu mukino. Ibizamini byerekana ko bafite ibibazo by'umutima. CAF ntishaka kwishyira mu byago ibyo ari byo byose. "
