Umuraperi Uwimana Francis uzwi ku izina rya Fireman yasezeranye imbere y'amategeko n'umukunzi we Kabera Charlotte yari amaze umwaka urenga yarambitse impeta nyuma yo kwemeranya kurushinga.
Uyu muhango wabaye kuri uyu wa 4 Mutarama 2022 ubera mu Ntara y'Iburasirazuba, Akarere ka Rwamagana, mu Murenge wa Mwurire.
Fireman asezeranye na Kabera nyuma y'uko yari yaramusabye kuzamubera umufasha muri Kanama 2020.
Nyuma yo kwambika impeta Kabera, Fireman yaje kugongwa n'urubanza yaregwagamo n'Ubushinjacyaha bwa gisirikare bwari bumukurikiranyeho gukubita no gukomeretsa abagororerwaga Iwawa.
Bitewe n'uru rubanza yaburanye umwaka urenga, Fireman yaje gusubika ibyo gutegura ubukwe.
Nyuma y'uko abaye umwere mu Ugushyingo 2021, Fireman yahise atangira gahunda zo gutegura ubukwe bwe na Kabera,bwabimburiwe n'umuhango wo gusezerana imbere y'amategeko kuri uyu wa 4 Mutarama 2022.
Source: IGIHE
