Abanyabigwib'ikipe ya Arsenal FC, Robert Pires, Ray Parlour na David Seaman,bari mu ruzinduko mu Rwanda ndetse amafoto ya mbere bayafotowe bageze mu karere ka Rusizi aho bagiye gusura Pariki ya Nyungwe.
Aba bagabo bamenyekanye muri iyi kipe yo mu Bwongereza bari mu Rwanda mu bikorwa by'ubukerarugendo bizamara iminsi itandatu.
Bifitanye isano n'amasezerano iyi kipe yasinyanye n'Urwego rw'Igihugu rw'Iterambere, RDB, yo kwamamaza igihugu binyuze muri gahunda ya Visit Rwanda.
Mu gihe bazamara mu gihugu bazatambagizwa ibyiza nyaburanga bitatse u Rwanda, birimo gusura Pariki y'Igihugu ya Nyungwe n'iy'Ibirunga.
Amakuru aravuga ko aba banyabigwi ba Arsenal barasura Pariki ya Nyungwe ejo kuwa Mbere tariki ya 07 Gashyantare 2022,hanyuma ku wa 2 basure Pariki y'ibirunga mu gihe ku wa 3 bikunze bahura n'abafana ba Arsenal.
Muri Gicurasi 2018 ni bwo byatangajwe ko Ikigo cy'Igihugu cy'Iterambere (RDB) cyinjiye mu bufatanye na Arsenal yo muri Premier League, u Rwanda ruyibera umuterankunga wa mbere ku maboko y'imipira, aho yambara 'Visit Rwanda' ku kuboko kw'ibumoso haba mu ikipe nkuru, iy'abatarengeje imyaka 23 no mu ikipe y'abagore.
RDB yatangaje ko nyuma y'imyaka itatu y'imikoranire yatanze umusaruro, mu 2019, impande zombi zanzuye ko zakongera igihe amasezerano yari kumara.
