Kizigenza Cristiano Ronaldo arimo kwifuzwa n'amakipe menshi arimo Paris Saint-Germain, Bayern Munich na Roma' aramutse avuye muri Manchester United muriyi mpeshyi.
Kugaruka k'uyu munya Portugal kuri Old Trafford ntabwo kwamuryoheye kuko United nta gikombe na kimwe isigayemo uretse UEFA Champions League nayo itayorohera kubera urwego iriho.Icyakora ubu iri mu ntambara yo kurangiza muri bane ba mbere muri Premier League.
Ronaldo w'imyaka 37 y'amavuko biravugwa ko ashobora kwigendera muri iyi mpeshyi United ninanirwa kujya mu gikombe cya UEFA Champions League umwaka utaha.
Ikinyamakuru The Sun kivuga ko ushakira Ronaldo amakipe,Jorge Mendes, yagiranye ibiganiro n'umuyobozi wa United, Richard Arnold ku bijyanye n'imikinire y'iyi kipe iri ku rwego rwo hasi.
Bivugwa ko hari abifuza gusinyisha uyu mukinnyi,by'umwihariko ikipe ya PSG cyangwa se kongera gukorana n'uwahoze ari umutoza wa Real Madrid, Jose Mourinho i Roma.
Ikinyamakuru The Sun cyahawe amakuru agira ati: 'Ronaldo atewe impungenge n'ejo hazaza. Nta kindi yifuza uretse gutwara ibikombe muri United, ariko kuri ubu bisa nkaho azaba ari urugamba.
Ntabwo yifuza kumara imyaka ibiri ya nyuma y'umwuga we mwiza ari hagati ku rutonde rwa shampiyona.
Amakipe akomeye ari gukurikirana uko ibintu bimeze kandi yashyize hanze ibyifuzo byayo."
Ronaldo yavuye muri Juventus asubira muri United muri Kanama umwaka ushize, asinya amasezerano y'imyaka ibiri ishobora kugabanukaho umwaka hakiri kare.
Ronaldo wari umaze imikino 6 adatsinda igitego,yaraye ahagaritse aka gahigo kabi ubwo yatsindaga igitego mu bitego 2-0 batsinze Brighton.
