Nyuma y'umukino wa Senegal na Burkina Faso wabaye mu ijoro ryo kuri uyu wa Gatatu tariki ya 02 Gashyantare 2022, ku mbuga nkoranyambaga abantu benshi bari gufata ifoto y'umusifuzi Tessema Weyesa bakarenzaho amagambo agira ati: 'Intwari ya Ethiopia na Afurika'.
Kubera iki uyu musifuzi w'umuhanga yaciye ibintu ku mbuga nkoranyambaga?
Tessema Weyesa ni we wasifuye umukino wa ½ mu gikombe cya Afurika, Senegal yatsinzemo Burkina Faso ibitego 3-1 mu ijoro ryo ku wa Gatatu kuiri Stade Ahmadou Ahidjo muri Cameroun.
Uyu munya-Ethiopia yasifuye neza byanyuze buri wese wawukurikiye ndetse no ku mpande z'abari bahanganye mu kibuga, ni umukino yatanzemo amakarita atatu y'umuhondo, abiri ku ruhande rwa Senegal ndetse n'imwe ku ruhande rwa Burkina Faso.
Kuyobora neza uyu mukino byagaragariraga buri wese ko ari ishiraniro, byatumye abakunzi b'umupira w'amaguru bamushimira, bamuvuga imyato ndetse bemeza ko ari ku ruhembe rw'abasifuzi beza muri Afurika. Hari n'abavuze ko byaba byiza abaye ariwe wahabwa gusifura umukino wa nyuma 'Final' wa CAN 2021.
Imyanzuro yagiye afata muri uyu mukino, byagaragariye benshi ko yaziye igihe kandi igafatwa neza, byazamuye amarangamutima ya benshi, bamwita intwari. Uyu mukino warangiye mu mahoro, Tessema ashimwa na buri wese, Senegal ikomeza ku mukino wa nyuma itsinze Burkina Faso ibitego 3-1.
Tessema Weyesa ni muntu ki?
Bamlak Tessema Weyesa yavutse tariki ya 30 Ukuboza 1980, avukira Addis Ababa muri Ethiopia. Ni umusifuzi mpuzamahanga akaba n'umushakashatsi mu bijyanye n'ubuvuzi (Medical researcher, a clinical coordinator and a sociology) wasoreje amasomo ye muri Addis Ababa University.
Tessema yatangiye umwuga wo gusifura mu 2003, aza kuba umusifuzi mpuzamahanga wemewe na FIFA mu 2009, ndetse mu 2010 asifura umukino we wa mbere mpuzamahanga wahuje Djibouti na Somalia.
Mu mwaka wa 2010, Tessema yasifuye imikino itanu muri CECAFA Cup irimo n'umukino wa nyuma wahuje Tanzania na Ivory Coast, mu 2011 nabwo yasifuye imikino ine muri iri rushanwa.
Mu 2012 uyu musifuzi wari umaze kugirirwa icyizere na CAF, yasifuye umukino w'ijonjora rya mbere muri CAF Champions League, umukino wari wabereye muri Tanzania ndetse anasifura umukino w'ijonjora rya kabiri muri Confederation Cup wabereye mu Misiri.
Mu 2014 uyu munya-Ethiopia yasifuye imikino yo gushaka itike y'igikombe cy'Isi cyabereye muri Brazil.
Tessema Weyesa uri gusifura imikino y'igikombe cya Afurika kiri kubera muri Cameroun, ashobora kuba ari we uzanasifura umukino wa nyuma w'iri rushanwa uteganyijwe kuba tariki ya 06 Gashyantare 2022.
Tessema yabaye igitaramo ku mbuga nkoranyambaga
