Menya ubumara bwa 'Aflatoxin' bushobora gutera igwingira mu bana #rwanda #RwOT

Ubushakashatsi bwagaragaje ko ubumara/uburozi bwa 'Aflatoxin' bukomoka ku ruhumbu ruza ku myaka bushobora gutera igwingira mu bana.

Umuyobozi Mukuru w'Ikigo cy'Igihugu cyita ku buhinzi n'ubworozi (RAB), Dr. Patrick Karangwa, abinyujije ku rukuta rwe rwa Twitter yasobanuye icyo 'Aflotoxin' ari cyo ndetse n'ingaruka zayo ku buzima bwa muntu n'ubw'amatungo.

Yatangiye agira ati '

Aflatoxin ni iki? Ikumirwa ite?

Aflatoxin ni ubumara/uburozi bukomoka ku ruhumbu ruza ku myaka nk'ibigori, imyumbati yinitse, n'iyindi. Nimbi cyane. Nko muri Kenya mu 2004, icyorezo cya aflatoxin kishe abarenga 120. Mu ngamba ziyihashya harimo kumisha no guhunika neza imyaka.

Ubushakashatsi bwagaragaje kandi ko 'aflatoxin' iri mu biteza igwingira mu bana mu bihugu bitandukanye. Umwaka ushize, muri Leta Zunze Ubumwe za Amerika hapfuye imbwa zororerwa mu ngo zigera kuri 70 kubera kurya ibiribwa byavuye mu ruganda bihumanyijwe na aflatoxin.'

Ushobora kuba warabonye ibigori, ubunyobwa cg se izindi mbuto zibitswe igihe kirekire zigatangira kuzana ibintu bimeze nk'ubwoya; icyo benshi bita uruhumbu, urwo ruhumbo ruba ruzingatiye uburozi bwa Aflatoxin.

Dr Karangwa yabajijwe niba uruhumbu ruza ku migati narwo ruba rufite ubu bumara/uburozi, yasubije agira ati 'Ikintu cyose gifite uruhumbu kigomba kwirindwa kuribwa. Habaho uruhumbu rufite ubwo burozi bwa aflatoxin n'urutabugira, ariko ku maso, atari muri labo, ntiwabasha kumenya urubufite n'urutabufite.'

Ishami ry'Umuryango w'Abibumbye ryita ku biribwa FAO ryatangaje ko iyo umuntu ariye ibiribwa birimo uburozi cyangwa anyweye amata cyangwa ibindi binyobwa byahumanyijwe n'uburozi  bwa Aflatoxin,  bimugiraho ingaruka zitandukanye zishobora kumubyarira urupfu. Muri izo ngaruka bavugamo n'indwara ya kanseri y'umwijima.

Bavuga kandi ko indwara ya kanseri ifata umwijima iri kwiyongera cyane mu bihugu bikiri mu nzira y'amajyambere ahanini bitewe n'uko abatuye ibi bihugu, bimwe mu biryo by'ibanze barya birimo ibinyampeke biba byarahumanyijwe n'uburozi bwa Aflatoxin.

[email protected] 

 

 

The post Menya ubumara bwa 'Aflatoxin' bushobora gutera igwingira mu bana appeared first on IRIBA NEWS.

Source : https://iribanews.rw/2022/02/16/menya-ubumara-bwa-aflatoxin-bushobora-gutera-igwingira-mu-bana/