Sadio Mané yatsinze penaliti yahaye intsinzi Senegal imbere ya Misirii kuri za penaliti 4 â€" 2 bituma begukana igikombe cya Africa cyabo cya mbere, nyuma y'uko amakipe yombi yari yananiranywe anganya ubusa ku busa.
Uyu rutahizamu wa Liverpool ariko yari yahushije penaliti hakiri kare ku munota wa karindwi gusa, yagaruwe n'umunyezamu Gabaski wa Misiri, wanabaye umukinnyi mwiza w'uyu mukino.
Muri uyu mukino wari witiriwe cyane ba rutahizamu ba Liverpool, Mohamed Salah wa Misiri na Sadio Mané, ariko uyu wa nyuma niwe wagize ijambo rya nyuma.
Nyuma y'imyaka irindwi yo kunengwa ko nta kinini araha ikipe ya Senegal nk'umutoza wayo, Aliou Cissé ubu yavuze ko byose ari ukwihangana.
Ati: 'Byerekana ko iyo ukoze cyane, iyo wihanganye, ugera kucyo ushaka. Mfite amarangamutima akomeye kuko abantu ba Senegal bifuje iki gikombe imyaka 60.'
Senegal yatsinzwe inshuro ebyiri ku mukion wa nyuma mu 2002 no mu 2019, hamwe Cissé yari kapiteni w'ikipe ahandi ari umutoza mukuru.
Senegal yayoboye uyu mukino isatira kenshi kurusha Misiri gusa iyi nayo yari ifite abugarizi bahagarara neza.
Rutahizamu Salah yari yahambiriwe cyane na myugariro ba Senegal, yabonye amahirwe abiri gusa yo gutsinda mu gice cya mbere.
Abakinnyi b'Ikipe ya Misiri bamanjiriwe nyuma yo gutsindwa na Senegal
Igice cya kabiri cyagoye Misiri kuko n'umutoza wayo yari yavanywe ku ntebe y'abasimbura, Senegal yarushijeho kugira amahirwe mu minota bongeyeho.
Ariko kureba mu nshundura birananirana kugeza umukino urangiye bagatera za penaliti aho Sadio Mané yashyizemo iya nyuma iha intsinzi igihugu cye.
Mohamed Salah yagaragaje agahinda kuko ubu ari ubwa kabiri atsindiwe ku mukino wa nyuma w'iki gikombe, yari mu ikipe ya Misiri yatsinzwe na Cameroun mu 2017.
'Mane yashyize Senegal ku bitugu bye'
Jermaine Jenas wahoze ari umukinnyi wa Tottenham Hotspurs yabwiye BBC ati: 'Sadio Mané yashyize igihugu cye ku ntugu ze maze abaha igikombe. Iyi Senegal ni ikiragano gikomeye cyashoboye kubigeraho, ni igihe gikomeye ku gihugu cyabo.'
Jenas avuga ko nubwo Mané yari ku gitutu gikomeye ariko yerekanye ko ari igihangange atsinda penaliti yari icyenewe kurusha izindi.
Ati: 'Urabibona ko Mané ari umukuru w'abandi. Turabizi ko ari umukinnyi wo ku rwego rwo hejuru, ariko uko yakuze mu myaka ishize byagaragaye neza uyu munsi mu gihe cy'ingenzi kurusha ibindi mu buzima bwe.'
Abakinnyi batowe barushije abandi
- Umukinnyi w'irushanwa: Sadio Mané
- Umunyezamu w'irushanwa: Edouard Mendy
- Umukinnyi watsinze ibitego (8) byinshi: Vincent Aboubakar (Cameroun)
- Umukinnyi mwiza wa finale: Mohamed Abou Gabal (Gabaski)
Igikombe cya Africa gitaha biteganyijwe ko kizabera muri Ivory Coast muri Kamena (6) na Nyakana(7) umwaka utaha.
BBCÂ
The post Sadio Mané yashyize Senegal ku bitugu bye-Amafoto appeared first on IRIBA NEWS.
Source : https://iribanews.rw/2022/02/07/sadio-mane-yashyize-senegal-ku-bitugu-bye-amafoto/
