Serubibi wahoze ari Umuyobozi Mukuru w'Ikigo cy'Igihugu gushinzwe imiturire (Rwanda Housing Authority) yabigarutseho ku wa 18 Gashyantare 2022 mu Rukiko Rukuru ubwo humvwaga ubujurire bwe.
Ni mu rubanza ruregwamo Rwamuganza Caleb wari Umunyamabanga uhoraho muri Minisiteri y'Imari n'Igenamigambi, Serubibi Eric wahoze ari Umuyobozi Mukuru w'Ikigo cy'Igihugu cy'Imyubakire( Rwanda Housing Authority) na Kabera Godfrey wahoze ari Umuyobozi Mukuru ushinzwe igenamigambi muri Miniseteri y'imari n'igenamigambi.
Ruregwamo kandi Rwakunda Christian wari Umunyamabanga Uhoraho muri Minisiteri y'Ibikorwaremezo.
Ibyaha bashinjwa bishingiye ku kuba mu 2018, Leta yashatse kugurira inzu ya A&P Ltd Urwego rw'Umutekano w'imbere mu Gihugu (NISS). Abo bagabo nibo bari mu itsinda ryakoze ibiganiro. Bashinjwa ko bakoze amanyanga, bakayigura ku giciro kidakwiriye.
Ku wa Gatanu Serubibi yitabye urukiko kugira ngo asobanure impamvu yashingiyeho ajuririra.
Yabwiye urukiko ko ku wa 31 Werurwe 2021, yatunguwe no kubona Urukiko Rwisumbuye rwa Gasabo rumuhamya ibyaha rukamukatira igihano cy'igifungo cy'imyaka 6 no gufatanya na bagenzi kwishyura Leta Miliyari 1,8 Frw.
Ubushinjacyaha bumurega icyaha cyo kugira akagambane n'upiganirwa isoko rya Leta; icyo gukoresha nabi umutungo ufitiye rubanda akamaro n'icyo gutanga isoko rya leta mu buryo bunyuranije n'amategeko.
Serubibi kuva yatangira kuburana mu 2020, yahakanye ibyaha ahubwo asaba kugirwa umwere.
Serubibi yabwiye urukiko ko impamvu zatumye ajurira harimo kuba urukiko rutarumvise neza uko ikibazo giteye, kuba rwarakoresheje amategeko mpanabyaha mu buryo bugenekereje cyangwa kutayakoresha uko ateye agahindurirwa inyito.
Indi ni uko ngo urukiko rwashingiye ku bimenyetso bidafite ishingiro cyangwa bidahuje n'ikiburanwa.
Yavuze ko ibyo yakoze byose yabikoreshejwe n'abayobozi bamukuriye kuko aribo bamwohereje mu nama ziga ku kugura iyo nyubako, yazivamo akanatanga raporo.
Serubibi yavuze ko inama yagiyemo yigaga uko hagurwa inyubako y'umunyemari Rusizana Aloys, yabaga atumwe n'uwari Minisitiri w'Ibikorwaremezo, Amb.Gaetete Claver.
Yavuze ko atari kumwangira kuko ikigo yari abereye Umuyobozi Mukuru cyabarirwaga muri Minisiteri y'Ibikorwaremezo.
Serubibi yavuze ko nk'Umuyobozi wa Rwanda Housing Authority, mu 2018/2019 yahawe Ingengo y'Imari ingana na miliyarli 12 Frw yo kugurira inzego za Leta inzu yo gukoreramo.
Ati 'Muri uwo mwaka nibwo twaguze inyubako ya Sosiyete yitwa A&P Ltd igurwa miliyari 11.623.000.000Frw harimo n'imisoro.'
Serubibi yavuze ko yakoze ibishoboka byose kugira ngo azigame miliyoni 300 Frw yagombaga kugurwa iyo nyubako, bityo leta ntihombe.
Ngo iyo ashaka kwiba cyangwa guhombya leta, yari kuba we na bagenzi ba baratanze miliyari 12 Frw ntihagire asubizwa mu isanduku ya leta.
Yabajije urukiko ati 'Murumva akagambane karabaye hehe ko ahubwo twaguze inzu y'akataraboneka kandi iciriritse mu biciro ugereranije n'izindi nyubako za Leta zaguzwe.'
Serubibi yavuze ko inyubako yaguzwe Miliyari 9,8 Frw hatabariwemo umusoro ugereranije n'izindi zaguzwe, ntako batagize ngo leta ntihendwe kandi ko aricyo bari bagamije.
Me Mutabazi Abayo Jean Claude wunganira Serubibi mu mategeko yasabye urukiko ko niba koko abantu bareshya imbere y'amategeko, Amb.Gatete Claver urukiko rwamuhamagaza agasobanura igurwa ry'iriya nyubako kuko ibyemezo bikomeye bya nyuma ariwe watanze umurongo wabyo.
Naho Me Niyitegeka Epaphrodite na we wunganira Serubibi, yasabye urukiko ko mu gihe uru rubanza rwazaba rufashweho icyemezo cya nyuma, umucamanza yazashingira ku bimenyetso byose byatanzwe n'uwo yunganira mu mategeko akagira Serubibi umwere.
Ubushinjacyaha bwo bwavuze ko ibisobanuro bya Serubibi n'abanyamategeko be bigamije kuyobya urukiko.
Bwavuze ko Serubibi yireguye avuga ko ibyo yakoze byose yabitewe n'uko Amb. Gatete Claver yamusabye kujya muri iyo nama ariko ko nta bimenyetso yabitangiye.
Ubushinjacyaha bwakomeje buvuga ko Minisitiri atari we ugena igurwa ry'inyubako za Leta kuko Minisiteri iba ifite Umunyamabanga Uhoraho kandi ko ariko kazi ke.
Ubushinjacyaha bwasabye Serubibi kwerekana ibimenyetso bifatika bihamya uruhare rwa Amb.Gatete Claver mu igurwa ry'inyubako yatumye bakurikiranywa mu nkiko.
Bwavuze kandi ko ibihano Serubibi yahawe n'Urukiko Rwisumbuye rwa Gasabo nta kubogama kurimo.
Kabera Godfrey wahoze ashinzwe igenamigambi muri Minisiteri y'Imari n'Igenamigambi nawe yahawe umwanya ngo yiregure.
Urukiko Rwisumbuye rwa Gasabo we rwamukatiye igifungo cy'imyaka itandatu n'ihazabu ya miliyoni 3 Frw no gufatanya na bagenzi be gusubiza mu isanduku ya Leta miliyari 1,8 Frw.
Rwari rwamuhamije icyaha cyo kuba icyitso mu gutanga amasoko ya Leta no gukoresha nabi umutungo ufitiye rubanda akamaro.
We yabwiye urukiko ko yazize gusa kuba yaritabiriye inama yigaga uko hagurwa inyubako ya Leta.
Yabwiye urukiko ko ari minisitiri umukuriye wamusabye kuyijyamo kandi ko atashoboraga gusuzugura umukoresha we.
Kabera yakomeje avuga ko n'ubwo mu igurwa ry'iyo nyubako haba harabayemo amakosa, adakwiye kubibazwa kuko nta cyemezo na kimwe yafashe iyo nyubako igurwa.
Me Kayijuka Ngabo umwunganira yabwiye urukiko ko uwo yunganira ari umwere kuko kwitabira inama gusa bitagize icyaha.
Yasabye ko mu gihe urukiko ruzaba rwiherereye, rwazamugira umwere rukanategeka agasubizwa imitungo ye kuko yose ubushinjacyaha bwayifatiriye.
Iburanisha rizakomeza ku matariki ya 17-18/ Werurwe 2022.
Abaregwa bose batawe muri yombi bwa mbere n'ubugenzacyaha muri Gicurasi 2020.
