Mu kiganiro Minisitiri w'Intebe, Dr. Edouard Ngirente yagiranye n'abanyamakuru kuri uyu wa gatatu yavuze ko ibihano Ibihugu by'Uburayi na Amarika byafatiye Uburusiya byatumye ubu U Rwanda ruri gushakisha ahandi rwakura ingano zavaga mu gihugu cy'Uburusiya ruzivanye muri Tanzaniya.
Ibihugu by'Uburayi na Amerika byafatiye ibihano byo mu rwego rw'ubukugu Uburusiya nyuma y'aho iki gihugu giteye Ukraine.
Uburusuya bwateye Ukaraine mu rwego rwo kuyikumira ngo itinjira mu Muryango wo Gutabarana w'Ibihugu by'Uburayi na Amerika (OTAN), aho bwavugaga ko uko OTAN yongera ibihugu biyigize binakikije Uburusiya ari ikibazo ku mutekano wabwo.
Umunyamakuru wa RFI wabajije Minisitiri w'Intebe icyo u Rwanda ruri gukora ngo ruhangane n'ingaruka zishobora guterwa n'ibihano by'Ubukungu Uburusiya bwafatiwe, Minisitiri w'Intebe yamusubije ko kugeza ubu 64% by'ifarini y'ingano u Rwanda rwakoreshaga yavaga mu Burusiya n'aho 14% by'inyongeramusaruro ikoreshwa mu buhinzi nayo ikaba ari ho yavaga.
Minisitiri w'Intebe yavuze ko u Rwanda ruri gushakisha ahandi hava ingano zivamo ifarini zisimbura izayavaga mu Burusiya cyangwa se hagashakishwa ibindi byakorwamo imikati atari ifarini y'ingano gusa.
Yagize ati:' Turi gushaka ahandi hava ingano ariko hanashakishwa uburyo hanaboneka ibindi umukati ukorwamo byo binabasha kuboneka mu Rwanda ku buryo bworoshye'.
Mu bindi bicuruzwa biri guhenda ku isoko, Minisitiri w'Inganda yavuze ko ibiciro by'isukali byazamutse kubera ahanini isukali yavaga Malawi, Suwaziland na Zambiya ingana hafi ya 55% by'iyo u Rwanda rukenera itakiza kubera inganda zaho barimo kuzisana!
Ikindi gicuruzwa Minisitiri w'Intebe yavuze ko cyazamutse mu biciro ku isoko ry'u Rwanda ni amavuta yo guteka. Minisitiri w'Ubucuruzi yavuze ko amavuta menshi aribwa mu Rwanda rwayavanaga mu Misiri no muri Aziya ariko kuri ubu ingendo zo mu mazi n'amato zikaba zarahenze.
Gusa ngo hari n'abacuruzi bahishe ibicuruzwa ngo bahende abakiliya kandi bararanguye bitarahenda, ndetse ngo hari n'abahanwe!
Gusa izamuka ry'ibiciro by'ibikomoka kuri Peterori, Minisitiri w'Intebe yavuze ko ntaho bihuriye n'intambara ya Ukraine kuko byari byaranazamutse mbere ko iyi ntambara iba.
Ibindi bicuruzwa byashoboraga kunganira ibiri ku isoko ryo mu Rwanda byakabaye ari ibiva muri Uganda nyuma y'aho Leta zombi zumvikaniye gufungura imipaka ariko kugeza ubu ibicuruzwa bivayo bikaba bitaremererwa kwinjira mu Rwanda.
Minisitiri w'Intebe akaba yavuze ko hacyuzwuzwa impapuro zijyanye n'ibisabwa ngo ibicuruzwa byaranguwe muri Uganda bibashe kwinjira ku isoko ryo mu Rwanda.
