Ni igikorwa cyabaye ku ya 2 Werurwe 2022 ku Cyicaro cya NIRDA i Kigali.
Bimwe mu bikubiye muri ayo masezerano birimo ko NIRDA izaha Bold Regains Life Care Industry Limited ubutaka bwa hegitari zirenga 150 bwo guhingamo ibimera bizifashishwa, imashishini na Laboratwari izajya ipima ibikorwa byabo mbere y'uko bijya ku isoko.
Umuyobozi wa NIRDA, Dr Birame Sekomo Christian yatangaje ko gukorana na Bold Regains Life Care Industry Limited birimo inyungu nyinshi ku Rwanda.
Ati 'Mbere na mbere bizatuma dushobora kugeza ku Banyarwanda imiti ituruka ku bimera idahenze. Bizatanga akazi ku Banyarwanda barimo abahinzi n'abazabona akazi kuri uru ruganda.'
Dr. Birame kandi yatangaje ko bibabaje ku ba imiti myinshi yinjira mu gihugu iva hanze kandi n'u Rwanda rufite ibyo bimera rwayikuramo.
Bold Regains Life Care Industry Limited yatangijwe n'abantu batatu ari bo Prof Dr Rajendran Aanaimuthu, inzobere mu buvuzi bukoresha imiti ikomoka ku bimera, Dr. Francis Habumugisha ukuriye Bold Regains International na Ndahayo Jean Pierre.
Prof. Dr. Rajendran Aanaimuthu yatangaje ko bashishikajwe no gukora imiti abantu bazabasha kubona ku giciro cyoroheje.
Ati 'Hano hari umutungo karemano uhagije tugiye kubyaza umusasuro dukora imiti myiza abantu bazabonera ku giciro cyo hasi'.
Dr. Francis Habumugisha yatangaje ko Life Care Phyto Labs-India iyobowe na Prof. Rajendran yihuje na Bold Regains International isanzwe icuruza inyunganiramirire bagakora ikigo kimwe ari cyo Bold Regains Life Care Industry Limited.
Yanatangaje ko ubufatanye na NIRDA bugiye kwihutisha ibikorwa bateganyaga gukorera mu Rwanda. Ibiganiro bagiranye na RDB ngo byagaragaje ko yishimiye uyu mushinga.
Ati 'Biragaragara ko Leta yishimiye iki gikorwa kuko kizatanga akazi ku Banyarwanda benshi yaba mu buhinzi, gukora mu ruganda ndetse no gutanga ubumenyi mu bya tekiniki binyuze mu kwigira ku nzobere zizaturuka mu Buhinde.'
Dr. Habumugisha kandi yashimangiye ko ibicuruzwa bya Bold Regains Life Care Industry Limited bizajya byoherezwa ku isoko ryo mu Rwanda no mu mahanga.
Bold Regains Life Care Industry Limited irateganya gutangiza vuba uru ruganda ruzajya rukora imiti ikozwe mu bimera n'inyunganiramirire.
