Uburusiya burimo kugerageza gucamo Ukraine ibice bibiri ngo bushyireho akarere bugenzura nyuma yuko bunaniwe gufata igihugu cyose, nkuko bivugwa n'umukuru w'ubutasi bwa gisirikare bwa Ukraine.
Ibiro ntaramakuru Reuters bitangaza ko mu itangazo yasohoye Kyrylo Budanov avuga ko Uburusiya burimo gushaka "gushyiraho Koreya ya Ruguru na Koreya y'Epfo muri Ukraine".
Reuters ivuga ko Bwana Budanov yongeyeho ko igihugu cye vuba aha kigiye gutangira intambara y'ibitero bya hato na hato (guerilla) mu gice cyigaruriwe n'Uburusiya.
Hagati aho, agace gashyigikiwe n'Uburusiya gasanzwe karitangaje ko ari Repubulika ya Rubanda ya Luhansk ko mu burasirazuba bwa Ukraine, vuba aha gashobora gukora amatora ya kamarampaka ku kwinjira mu Burusiya, nkuko bivugwa na Leonid Pasechnik, umutegetsi waho uharanira ko kigenga, wasubiwemo n'ibiro ntaramakuru RIA bya leta y'Uburusiya.
Mu kwezi kwa kabiri, Perezida w'Uburusiya Vladimir Putin yatangaje ko yemeye ubwigenge bwa Donetsk na Luhansk, uturere tubiri bwo mu majyepfo ashyira uburasirazuba twitandukanyije na Ukraine, buri kamwe kakitangaza ko ari Repubulika ya Rubanda.
Icyo cyemezo cya Bwana Putin cyo kwemera utwo turere nka repubulika zigenga, cyamaganwe n'umuryango w'ubwirinzi bwa gisirikare bw'Uburayi n'Amerika (OTAN/NATO) ndetse n'ibihugu byo mu burengerazuba bw'isi.
BBC
